Salmo 115

Ang Pulong Sa Dios

³ Ang among Dios anaa sa langit ug buhaton niya ang iyang gusto.
⁴ Apan ang ilang mga dios-dios binuhat lang sa tawo gikan sa plata ug bulawan.
⁵ May mga baba kini, apan dili makasulti;
may mga mata, apan dili makakita.
⁶ May mga dalunggan, apan dili makadungog;
may mga ilong, apan dili makasimhot.
⁷ May mga kamot, apan dili makakupot;
may mga tiil, apan dili makalakaw,
ug dili gani makatingog.
⁸ Ang tanang naghimo ug misalig niini nga mga dios-dios mahisama usab kanila nga walay pulos.

^9-10 Kamong mga katawhan sa Israel, apil na kamong mga kaliwat ni Aaron, salig kamo sa Ginoo.
Siya ang inyong magtatabang ug tigpanalipod.
¹¹ Kamong nagatahod sa Ginoo, salig kamo kaniya.
Siya ang inyong magtatabang ug tigpanalipod.
¹² Kanunay kitang gihunahuna sa Ginoo, ug panalanginan niya kita.
Panalanginan niya ang katawhan sa Israel apil na ang mga kaliwat ni Aaron.
¹³ Panalanginan niya ang tanang nagatahod kaniya, inila man o dili.
¹⁴ Hinaut nga kamo ug ang inyong mga kaliwat padaghanon sa Ginoo.
¹⁵ Hinaut nga panalanginan kamo sa Ginoo nga nagbuhat sa kalangitan ug sa kalibotan.
¹⁶ Ang kalangitan iya sa Ginoo, apan ang kalibotan gitugyan niya sa mga tawo.
¹⁷ Ang mga patay dili makadayeg sa Ginoo, kay atua na sila sa hilom nga lubnganan.
¹⁸ Kita nga mga buhi mao ang makadayeg kaniya karon ug hangtod sa kahangtoran.

Dayega ang Ginoo!