Salmo 114

Ang Pulong Sa Dios

114 Ang mga Israelinhon nga kaliwat ni Jacob nagpuyo kaniadto didto sa Ehipto diin lahi ang pinulongan sa mga tawo.
² Sa dihang mibiya na sila sa Ehipto,
gihimo sa Dios ang Juda nga iyang balaang dapit,
ug gidumalahan niya ang Israel.
³ Sa pag-abot sa mga Israelinhon didto sa Pulang Dagat, daw tawo kini nga mitan-aw kanila ug midagan.
Ang tubig sa Suba sa Jordan daw tawo usab nga miatras.
⁴ Ang mga bukid ug mga bungtod daw mga kanding ug mga karnero nga naglukso-lukso.
⁵ Nganong midagan man ang Pulang Dagat
ug miatras ang tubig sa Suba sa Jordan?
⁶ Nganong naglukso-lukso ang mga bukid ug mga bungtod nga daw mga kanding ug mga karnero?
⁷ Mokurog ang kalibotan sa presensya sa Ginoo nga Dios ni Jacob,
⁸ nga naghimo ug linaw gikan sa gahing bato ug mipadagayday sa mga tuboran.