Nnwom 102

Nkwa Asem

Aberante mmɔborɔni mpaebɔ

102 Tie me mpaebɔ, O Awurade, na tie me sufrɛ na boa me. ² Sɛ mewɔ ɔhaw mu a, nnan w’akyi nkyerɛ me! Tie me na sɛ mefrɛ a, gye me so ntɛm! ³ Me nkwa reyera te sɛ wusiw; me nipadua rehyew te sɛ ogya. ⁴ Meretwintwam sɛ sare a awo. Me kɔn nnɔ aduan. ⁵ Mepene dennen. Menyɛ hwee sɛ honam ne nnompe. ⁶ Mete sɛ wuram anomaa a ɔwɔ sare so. Mete sɛ ɔpatu a wɔagyaw no amamfo so. ⁷ Meda hɔ a, m’ani gu so. Mete sɛ anomaa koro a osi ɔdan bi atifi.

⁸ Daa m’atamfo kasa tia me. Wɔn a wodi me ho fɛw bɔ me din de dome me. ⁹ Esiane w’abufuw nti, nso ne m’aduan na me nusu fra nea menom mu. ¹⁰ Womaa me so tow me kyenee. ¹¹ Me nkwa te sɛ anwummere sunsuma; mete sɛ sare a awo ¹² nanso, wo Awurade, woyɛ ɔhene daa daa. Nkyirimma nyinaa bɛkae wo.

¹³ Wobɛsɔre na woahu Sion mmɔbɔ; bere adu sɛ wuhu no mmɔbɔ; bere pa no ni. ¹⁴ W’asomfo dɔ no a ɛmfa ho sɛ wɔasɛe no; wohu no mmɔbɔ a ɛmfa ho sɛ wadan amamfo. ¹⁵ Aman besuro Awurade; ahene a wɔwɔ asase so nyinaa besuro ne tumi. ¹⁶ Sɛ Awurade san kyekye Sion a, ɔbɛda ne kɛseyɛ adi.

¹⁷ Obetie ne nkurɔfo a wagyaw wɔn no na watie wɔn mpaebɔ. ¹⁸ Kyerɛw nhoma a Awurade ayɛ no gu hɔ ma nkyirimma sɛnea ɛbɛyɛ a wɔn a wonnya nwoo wɔn no bɛkamfo no. ¹⁹ Awurade hwɛɛ fam fi ne kronkronbea wɔ soro hɔ; ɔhwɛ fi soro besii asase so. ²⁰ Ɔtee ɔpene a nneduafo pene na ɔma wogyaa wɔn a wɔabu wɔn kumfɔ no. ²¹ Enti wɔbɛpae mu abɔ ne din wɔ Sion na wɔakamfo no wɔ Yerusalem, ²² bere a aman ne ahemman behyiam na wɔasom Awurade no.

²³ Awurade ama me ayɛ mmerɛw wɔ bere a minnyinii. Watew me nkwa nna so. ²⁴ O Onyankopɔn, mfa me mprempren a minnyinii yi. O Awurade, wote hɔ daa daa. ²⁵ Tete no, wobɔɔ asase na wode wo nsa yɛɛ ɔsoro. ²⁶ Wɔn nyinaa bɛyera nanso ɛbɛka wo. Wɔn nyinaa bɛtetew te sɛ ntamagow. Wobɛtow wɔn agu sɛ ntamagow na wɔayera. ²⁷ Nanso wote sɛnea wote. Wo nkwa to ntwa da.

²⁸ Yɛn mma bɛtena ase a hwee nyɛ wɔn wɔ wo banbɔ ase, na wɔn asefo nso benya guankɔbea.