Jesus Make One Guy Wit Bad Kine Spirits Come Good

5 Afta dat, Jesus dem go da odda side da lake wea da Gerasa peopo stay. ² Wen Jesus was getting outa da boat, one guy dat get one bad kine spirit dat wen take ova him wen come from da grave yard. ³ He everytime stay inside da grave yard. Da bad spirit wen make him so strong, nobody can tie him up, not even wit chains. ⁴ Befo, dey wen tie da guyʼs hand an feet plenny times wit da chains, but he wen bus um. Nobody stay strong nuff fo hold da guy down. ⁵ Nite an day, da guy everytime yelling from da grave yard, an da hills, an cutting himself wit stones.

⁶ Wen he see Jesus far away, he wen run an go down in front him. Jesus tell him, “Let go da guy, you bad kine spirit you!” Da guy wen yell real loud, “Wat you like do to me, Jesus? Da God Dass Mo Importan Den All Da Odda Gods, you his Boy! Promise to God you no goin make me suffa!”

⁹ Den Jesus wen aks him, “Eh, wat yoa name?” An da bad kine spirit tell him, “My name ‘Army,’ cuz us guys, we uku paila spirits!”

¹⁰ An da spirit beg Jesus plenny times, “Eh, no send us outa dis place!”

¹¹ On da odda side da hill, get one big pig farm, an da pigs was grinding. ¹² Da bad kine spirits wen beg Jesus, “Send us inside da pigs! We like take ova dem.”

¹³ Jesus tell um, “Go!” So da bad spirits wen let go da guy, an go take ova da pigs. Had bout two tousand pigs ova dea. An you know wat? All da pigs wen run down one steep hill an fall ova da cliff inside da lake, an drown inside da water.

¹⁴ Den da pig farmas wen run, an go inside da town an all da place aroun dea, telling everybody wat wen happen. All da peopo from da town wen go fo see.

¹⁵ Wen dey come by Jesus, dey spock da guy dat befo get da uku paila bad kine spirits dat wen take ova him. He look diffren now. He all dress up, an not pupule no moa. So da peopo real scared. ¹⁶ Da odda guys who wen see wat wen happen, dey tell da peopo wat wen happen to da guy wit da bad kine spirits an da pigs. ¹⁷ Den da peopo, dey start fo beg Jesus fo go way from dea.

¹⁸ Wen Jesus climb inside da boat, da guy dat da bad kine spirits wen take ova befo time, he say, “Try let me go wit you.”

¹⁹ But Jesus tell, “No. Go home to yoa ohana, an tell um all da good kine stuff da Boss Up Dea wen do fo you. He wen pity you an give you chance.” ²⁰ So da guy go way, an tell everybody in da Ten Towns wat Jesus wen do fo him. An wat he tell all da peopo, wen blow dea minds.

Jairus, Da Leada Guy

²¹ So den, Jesus wen come back in da boat to da odda side da lake. An plenny peopo wen come aroun him wen he still near da lake. ²² One leada guy from da Jewish church name Jairus wen come dea. He spock Jesus, an wen go down on his knees by Jesus feet ²³ an beg him plenny, “Eh, my litto girl, her ony twelve years old, an her stay going mahke. Try come an put yoa hand on top her, so she can come good an stay alive!” ²⁴ So Jesus wen go wit Jairus. An all da peopo wen go wit Jesus. Dey so plenny, dey wen push aroun him.

Jesus Wen Make One Sick Wahine Come Good

²⁵ Get one wahine wit da peopo. Her was bleeding fo twelve years. ²⁶ Her wen suffa plenny, no matta plenny doctas wen try make her good. Her wen spend all her money, but her neva come good. Her come mo worse. ²⁷ Her wen hear bout Jesus, so her come in back a him wit all da peopo aroun him, an her touch his clotheses. ²⁸ Her tinking, “If I can ony touch his clotheses, I goin come good again.” ²⁹ Right away her bleeding wen pau, an her wen feel inside her dat she no mo suffa.

³⁰ Right den an dea, Jesus wen feel power go outa him. He wen turn aroun an look all da peopo. He tell, “Eh, who wen touch my clotheses?”

³¹ His guys say, “How come you say dat? Get uku paila peopo pushing aroun you. But you go aks who touch you?” ³² Jesus stay looking aroun fo see who wen touch him.

³³ Den da wahine, she wen know wat wen happen to her. She so scared, she shaking. She wen go down by his feet, an wen tell him da whole story.

³⁴ An Jesus wen tell her, “Eh sista, you wen trus me. Dass why you come good. Go now, yoa heart goin rest inside. You no suffa no moa.”

Jesus Make Jairus Girl Come Good

³⁵ Jesus still talking, an some guys wen come from Jairus house, da leada guy fo da Jewish church. Dey tell him, “Yoa litto girl wen mahke! Mo betta you no bodda da teacha no moa.”

³⁶ But Jesus neva listen to dem. He tell Jairus, “No scared. Ony trus me.”

³⁷ He ony let Peter, James, an James brudda John, go wit him. ³⁸ Dey wen come Jairus house. Jesus see all da peopo an hear um making big noise an crying. ³⁹ He go inside an tell, “Eh, how come you guys making big noise an crying? Da girl neva mahke, her ony sleeping.”

⁴⁰ An dey wen laugh at him. So he wen chase um all outside, an take da girlʼs fadda an mudda, an his three guys, an dey go inside da room wea da girl stay. ⁴¹ He take da girlʼs hand an tell her, “Talita kum.” Dat mean, “Eh! Litto girl, get up!”

⁴² Eh, right den an dea her wen stand up, an walk aroun. An da peopo, right den an dea, dea jaws wen drop. ⁴³ Den he wen tell um, “You guys betta not tell nobody bout dis! Now, go make her someting fo eat.”