Ang Tubag ni Elifaz

22 Unya mitubag si Elifaz nga taga-Teman, ² “May pulos ba ang tawo ngadto sa Dios? May kaayohan bang ikahatag ang tawong maalamon kaniya? ³ Malipay ba ang Makagagahom nga Dios kon matarong ka? May makuha ba siya kon walay ikasaway sa imong kinabuhi? ⁴ Gibadlong ka sa Dios ug gihukman dili tungod kay nagatahod ka kaniya, ⁵ kondili tungod kay labihan na gayod ang imong kadaotan ug wala nay undang ang imong pagpakasala. ⁶ Sa walay kalooy gikuha mo ang bisti sa imong isigka-tawo isip garantiya sa iyang utang kanimo, ug halos wala na siyay bisti. ⁷ Wala mo hatagig tubig ang giuhaw, ug wala mo usab hatagig pagkaon ang gigutom. ⁸ Gigamit mo ang imong pagkagamhanan ug pagkadungganon sa pag-angkon ug yuta. ⁹ Kon mangayo kanimo ug tabang ang mga biyuda, gipapauli mo sila nga walay dala. Apil ang mga ilo wala mo ayoha pagtagad. ¹⁰ Mao kana ang hinungdan nga nalibotan ka sa mga lit-ag, ug kalit nga moabot kanimo ang kahadlok. ¹¹ Mao kana ang hinungdan kon nganong nangitngitan ka, nabutaan, ug nalapawan sa baha.

¹² “Ang Dios anaa sa kinaibabwan sa langit, labaw pa sa kinalayoan nga mga bitoon. ¹³ Mao kana nga miingon ka, ‘Wala mahibalo ang Dios sa akong ginahimo. Natabonan siya sa bagang dag-om, unsaon man niya paghukom? ¹⁴ Natabonan siya sa bagang panganod, busa dili niya kita makita samtang naglakaw siya ibabaw sa langit.’

¹⁵ “Magpadayon ka ba sa pagsunod sa mga gawi nga dugay nang gisunod sa mga tawong daotan? ¹⁶ Nangamatay sila nga dili pa nila panahon; nahisama sila sa pundasyon sa balay nga gianod sa baha. ¹⁷ Miingon sila sa Makagagahom nga Dios, ‘Pasagdi lang kami! Unsa may mahimo mo kanamo?’ ¹⁸ Apan ang Dios mao ang nagpuno sa ilang mga balay sa maayong mga butang. Busa kon unsa may itambag niining daotang mga tawo, dili gayod ako mamati.

¹⁹ “Kon makita sa matarong ug inosente nga mga tawo ang pagkalaglag sa daotang mga tawo, malipay ug magkatawa sila kanila. ²⁰ Moingon sila, ‘Nalaglag na gayod ang atong mga kaaway, ug gilamoy sa kalayo ang ilang kabtangan.’

²¹ “Job, pagpasakop sa Dios ug pakighusay kaniya aron panalanginan ka niya. ²² Dawata ang iyang mga katudloanan ug tipigi sa imong kasingkasing ang iyang mga pulong. ²³ Kon mobalik ka sa Makagagahom nga Dios, ug kuhaon mo ang kadaotan gikan sa imong panimalay, ibalik niya ang maayo mong kahimtang. ²⁴ Ayaw hatagig bili ang imong mga bulawan; isipa kini nga daw sama lang sa balas o mga bato lang sa suba. ²⁵ Ug ang Makagagahom nga Dios mahimong sama sa bulawan ug mahalong plata alang kanimo. ²⁶ Unya makaplagan mo ang kalipay nga nagagikan sa Makagagahom nga Dios, ug dili ka na maulaw nga moduol kaniya. ²⁷ Mag-ampo ka ngadto kaniya ug pamation ka niya, ug tumanon mo ang imong mga saad kaniya. ²⁸ Unsa man ang imong ginaplano nga pagabuhaton, matuman kini, ug modan-ag ang kahayag sa imong agianan. ²⁹ Kon adunay tawo nga maluya, ug kon moampo ka sa Dios nga lig-onon siya, tabangan niya ang maong tawo. ³⁰ Bisan ang mga tawo nga nakasala luwason niya pinaagi sa imong matarong nga kinabuhi.”