“Aloha”!

¹ Dis letta from me Paul, an Brudda Timoty. I stay in jail, you know, cuz I stay tight wit Jesus Christ.

Aloha, Filemon! Me an Timoty, we get plenny love an aloha fo you, an we stay working togedda fo da same ting. ² Tell Sista Afia we say “Aloha!” Our friend Arkippus, he one worka fo God jalike us. Tell him “Aloha!” too, an all da church peopo dat come togedda yoa house, tell um we say “Aloha!” too. ³ Our Fadda God, an da Boss Jesus Christ, we like dem do plenny good stuff fo you, an make yoa heart rest inside.

Filemon Get Love Fo da Bruddas, an Trus God

⁴ Brudda Filemon, every time I pray, I no foget fo tank my God fo you. ⁵ Everybody stay telling me bout da love an aloha you get fo all da peopo dat stay spesho fo God, an how plenny you trus Jesus, da Boss. ⁶ You stay trus Jesus jalike we all trus him. Dass why I stay aks God, “Let Filemon know all da good kine stuff you get fo us guys, so we all can come mo tight wit Jesus, da Spesho Guy You Wen Send!” ⁷ Brudda, cuz you stay get love an aloha fo da peopo dat stay spesho fo God, I feel good inside. Weneva I no feel good inside, tinking bout you make me feel good again, cuz da peopo dat stay tight wit God, you make dea hearts come good inside again.

Paul Aks Filemon fo Kokua Onesimus

⁸ You know, I stay tight wit Christ, so I no shame fo tell you dis: you know how fo ack, so jus do um. ⁹ But I ony one old man name Paul, in jail cuz I stay tight wit Christ, so I like you try do someting cuz you get plenny love an aloha fo me. ¹⁰ You rememba da guy Onesimus? I like tell you dis bout him: now, he jalike my boy, an I jalike his fadda, fo real kine, cuz I wen help him trus God wen he was inside da jail wit me. His name Onesimus, dat mean, Da Helpa Guy! ¹¹ Befo time, he stay good fo notting to you. But now, he stay help me, an he goin help you. ¹² He da guy I goin send by you, an my heart stay wit him. ¹³ I wen like keep him ova hea wit me, so he can help me da same way you wen like help me, but I neva. I stay inside da jail, you know, cuz I stay tell da Good Stuff From God. ¹⁴ But I neva like do notting if dass not okay wit you. I no like you do um cuz you gotta! I tink mo betta you do um cuz you like.

¹⁵ I tink dass why God wen let him go way from you fo litto bit, so dat you goin get him back foeva. ¹⁶ Now, he not jus one slave, but mo betta den one slave! He one brudda! We all get love an aloha fo him, but I get even mo, an you too, even mo plenny! You know him jalike befo, an now you an him know each odda jalike you bruddas, cuz you an him stay tight wit da Boss Jesus.

¹⁷ If you tink me an you work togedda good, I like you take him in, jalike was me who goin come yoa house. ¹⁸ If he wen rip you off, o owe you money, let me know, cuz dat goin be my pilikia. ¹⁹ I, Paul stay writing dis wit my own hand. I goin pay you wateva Onesimus owe you. But rememba dat you owe me someting too -- cuz a me, you get da kine life dass fo real! ²⁰ Eh, brudda, you can do someting fo me. Cuz you da Bossʼs guy, I like you fo make my heart come good inside, cuz you an me stay tight wit Christ.

²¹ I write dis to you, cuz I know you goin do um, an you goin do even mo plenny den wat I say. ²² An one mo ting, make one room ready fo me. I stay shua God goin let me go ova dea yoa place fo stay, cuz you guys everytime pray fo me.

Paul Tell da Odda Peopo “Aloha!”

²³ Epafras, he like say “Aloha!” He stay inside da jail wit me, cuz me an him stay tight wit da Spesho Guy God Wen Send, Jesus. ²⁴ Mark, Aristarkus, Demas, an Luke, da guys dey working wit me, dey say “Aloha!” too.

²⁵ I like you guys know deep inside da good way our Boss Jesus make to you.