1 Korinta 11:2-16

Reimer 2001

² Nu low ekj junt, Breeda, daut jie mie enn aulem behoole ha, en hoole dee Lea so aus ekj junt dee jeef.

³ Nu wel ekj daut jie weete selle daut Christus aewa daem Maun es, en de Maun aewa de Fru es, en Gott es aewa Christus.

⁴ En jieda Maun dee baede oda praedje deit wan sien Kopp bedakjt es, schaemt daem dee aewa am es.

⁵ Oba ne jiede Fru dee baede oda praedje deit en haft aea Kopp nich bedakjt, schaemt daem dee aewa aea es, dan daut es jrod so aus wan see jeshoare wea.

⁶ Wan ne Fru nich bedakjt es, dan lot aea uk jeschoare senne; dan wan daut ne schaund es fa ne Fru de Hoa auftoschniede oda jeschore to senne, dan lot aea sikj bedakje.

⁷ Dan de Maun sull sikj bediedent nich de Kopp bedakje, dan hee es Gott sien Bilt en Harlichkjeit; oba de Fru es daem Maun siene Harlichkjet.

⁸ Dan de Maun es nich fonn de Fru, oba de Fru fonn daem Maun;

⁹ Dan de Maun wort nich erschaufe waeajen de Fru, oba de Fru waeajen daem Maun.

¹⁰ Doaromm saul de Fru Macht habe opp aea Kopp omm dee Enjel aea haulwe.

¹¹ Trotsdaem, emm Herr es de Fru nusscht oone de Maun, en de Maun nusscht oone de Fru.

¹² Dan so aus de Fru fonn daem Maun es, so es uk de Maun derch de Fru - oba aules es fonn Gott.

¹³ Recht fa junt selfst: esset aunjenaem fa ne Fru Gott auntobaede oone bedakjt to senne?

¹⁴ Deit de Natua nich selfst leare dautet fa en Maun nich ne Ea es wan hee lange Hoa haft?

¹⁵ Oba wan ne Fru lange Hoa haft es daut fa aea ne Harlichkjeit, nich soo? Dan aea es daut Lange Hoa jejaeft enne Staed ne Bedakjunk.

¹⁶ Oba wan waea tsenkjesh wel senne, wie ha nich soone Jewannheit, uk nich Gott siene Jemeente.