²⁶ Τί οὖν ἐστιν, ἀδελφοί; ὅταν συνέρχησθε, ^[a]ἕκαστος ψαλμὸν ἔχει, διδαχὴν ἔχει, ^[b]ἀποκάλυψιν ἔχει, γλῶσσαν ἔχει, ἑρμηνείαν ἔχει· πάντα πρὸς οἰκοδομὴν γινέσθω. ²⁷ εἴτε γλώσσῃ τις λαλεῖ, κατὰ δύο ἢ τὸ πλεῖστον τρεῖς, καὶ ἀνὰ μέρος, καὶ εἷς διερμηνευέτω· ²⁸ ἐὰν δὲ μὴ ᾖ ^[c]διερμηνευτής, σιγάτω ἐν ἐκκλησίᾳ, ἑαυτῷ δὲ λαλείτω καὶ τῷ θεῷ. ²⁹ προφῆται δὲ δύο ἢ τρεῖς λαλείτωσαν, καὶ οἱ ἄλλοι διακρινέτωσαν· ³⁰ ἐὰν δὲ ἄλλῳ ἀποκαλυφθῇ καθημένῳ, ὁ πρῶτος σιγάτω. ³¹ δύνασθε γὰρ καθ’ ἕνα πάντες προφητεύειν, ἵνα πάντες μανθάνωσιν καὶ πάντες παρακαλῶνται ³² (καὶ πνεύματα προφητῶν προφήταις ὑποτάσσεται, ³³ οὐ γάρ ἐστιν ἀκαταστασίας ὁ θεὸς ἀλλὰ εἰρήνης), ὡς ἐν πάσαις ταῖς ἐκκλησίαις τῶν ἁγίων.

³⁴ Αἱ ^[d]γυναῖκες ἐν ταῖς ἐκκλησίαις σιγάτωσαν, οὐ γὰρ ^[e]ἐπιτρέπεται αὐταῖς λαλεῖν· ἀλλὰ ^[f]ὑποτασσέσθωσαν, καθὼς καὶ ὁ νόμος λέγει. ³⁵ εἰ δέ τι ^[g]μαθεῖν θέλουσιν, ἐν οἴκῳ τοὺς ἰδίους ἄνδρας ἐπερωτάτωσαν, αἰσχρὸν γάρ ἐστιν γυναικὶ ^[h]λαλεῖν ἐν ἐκκλησίᾳ. ³⁶ ἢ ἀφ’ ὑμῶν ὁ λόγος τοῦ θεοῦ ἐξῆλθεν, ἢ εἰς ὑμᾶς μόνους κατήντησεν;

³⁷ Εἴ τις δοκεῖ προφήτης εἶναι ἢ πνευματικός, ἐπιγινωσκέτω ἃ γράφω ὑμῖν ὅτι κυρίου ^[i]ἐστὶν· ³⁸ εἰ δέ τις ἀγνοεῖ, ^[j]ἀγνοεῖται. ³⁹ ὥστε, ἀδελφοί ^[k]μου, ζηλοῦτε τὸ προφητεύειν, καὶ τὸ λαλεῖν ^[l]μὴ κωλύετε γλώσσαις· ⁴⁰ πάντα ^[m]δὲ εὐσχημόνως καὶ κατὰ τάξιν γινέσθω.