मीका 7

Awadhi Bible: Easy-to-Read Version

7 मइँ बियाकुल अहइँ।
काहेकि मइँ गरमी क उ फले जइसा अहउँ जेका अबहुँ तलक बिन लीन्ह ग अहइ।
    मइँ ओन अंगूरन जइसा अहउँ जेनका तोरि लीन्ह ग अहइ।
अब हुआँ कउनो अंगूर खाइ क नाहीं बचा अहइ।
    सुरूआती क अंजीर जउन मोका भावत हीं, एक भी नाहीं बची अहइँ।
² एकर इ अरथ अहइ सबहिं सच्चे लोग जात रहत अहइँ।
    कउनो भी सज्जन मनई इ पहँटा मँ नाहीं बचा अहइ।
हर मनई कउनो दूसर क मारइ क घात मँ रहत ह।
    हर मनई आपन ही भाई क फँदा मँ फँसावइ क जतन करत बाटइ।
³ लोग दुइनउ हाथन स बुरा करइ मँ होसियार अहइँ। अधिकारी लोग रिसवत माँगत हीं।
    निआव क जज अदालतन मँ फइसला बदलइ बरे घूस लेत रहत हीं।
“महत्वपूर्ण मुखिया” खरा अउ निस्पच्छ निर्णय नाहीं लेतेन।
    ओनका जइसा भावत ह उ पचे वइसा ही काम करत हीं।
⁴ हिआँ तलक कि ओनकर सर्वोच्च काँटन क झाड़ी जइसा होत ह।
    हिआँ तलक कि ओनकर सबन त जियादा धर्मी मनई भी काँटन क झाड़ी स जियादा टेंढ़ होत ह।

उ दिना जेका तू अपेच्छा किहे रहा
    जउन तोहार सज़ा बरे होइ,
आवत हीं।
    अब तू पचन उलझ जाब्या।
⁵ तू पचे आपन पड़ोसी क भरोसा जिन करा।
    तू पचे मित्र क भरोसा जिन करा
आपन पत्नी तलक स
    खुलिके बात जिन करा।
⁶ आपन ही घरे क लोग एक दूसरे क संग दुस्मन जइसा बेउहार करिहीं।
    पूत आपन बाप क आदर नाहीं करी।
बिटिया आपन मताहरी क खिलाफ होइ जाइ।
    पतोहू आपन सास क खिलाफ होइ जाइ।

⁷ मइँ मदद बरे यहोवा क निहारब।
    मइँ परमेस्सर क इंतजार करब कि उ मोका बचाइ लेइ।
    मोर परमेस्सर मोर सुनी।
⁸ मोर पतन भवा ह।
    मुला हे मोरे दुस्मन, मोर हँसी जिन उड़ावा।
मइँ फुन स खड़ा होइ जाबउँ।
    यदपि आजु मइँ अँधियारा मँ बइठा हउँ यहोवा मोरे बरे प्रकास होइ।

⁹ यहोवा क खिलाफ मइँ पाप किहे रहेउँ।
    एँह बरे उ मोह पइ कोहान रहा।
मुला अदालत मँ उ मोरे अभियोग क वकालत करी।
    उ, इ सबइ ही काम करी जउन मोरे बरे उचित अहइ।
फुन उ मोका बाहेर प्रकास मँ लइ आइ
    अउर मइँ ओकरे छुटकारा का लखब।
¹⁰ फुन मोर बैरिन इ लखी अउर लजाइ जाइ।
    मोर बैरिन इ मोसे कहे रही,
“तोहार परमेस्सर यहोवा कहाँ बा?”
    उ समइ, मइँ ओह पइ हँसब।
लोग ओका अइसे कुचरि डइहीं
    जइसे गलियन मँ कीचं कुचरि डाइ जात हीं।

¹¹ उ समइ आइ, जब तोहरे देवारन क फुन निर्माण होइ।
    एक दिना तोहार देवार बहोत दूर तलक बढ़िहीं।
¹² तोहार लोग तोहरी धरती पइ लउटि अइहीं।
    उ सबइ लोग अस्सूर स अइहीं
अउर उ सबइ लोग मिस्र क सहरन स अइहीं।
    तोहार लोग मिस्र स अउर परात नदी क दूसरी छोर स अइहीं।
उ सबइ पच्छिम क समुद्दर स
    अउर पूरब क पहाड़ी स अइहीं।

¹⁵ जब मइँ तू पचन्क मिस्र स निकारिके लइ आए रहेउँ, तउ मइँ बहोत स चमत्कार किहे रहेउँ।
    वइसेन ही अउर चमत्कार मइँ तू पचन्क देखाँउब।
¹⁶ उ सबइ चमत्कारन क सबइ जाति लखिहीं
    अउर लजाइ जइहीं
उ सबइ जातियन लखिहीं
    कि ओनकर “सक्ति” मोरे समन्वा कछू नाहीं अहइ।
उ सबइ चकित रहि जइहीं
    अउर उ सबइ आपन मुँहे पइ हाथ रखिहीं।
उ पचे कान क ढाँपि लेइहीं
    अउर कछू नाहीं अनकिहीं।
¹⁷ उ पचे धूरि चाटत साँपन क नाईं
    अउर रेंगत भए जीव क नाईं धरती पइ रहइँ।
उ पचे अइसे किरवन नाईं रेगंत रहइँ आपन बिलन स निकरत हीं।
    उ पचे डेरात-काँपत भए
    हमरे परमेस्सर यहोवा क लगे जइहीं।
परमेस्सर, उ पचे तोहरे समन्वा डेरइहीं।

¹⁸ तोहरी नाई कउनो परमेस्सर नाहीं अहइ।
    तू पापी लोगन्क छिमा कइ देत अहा।
    तू आपन बचे भए लोगन क पापन क छिमा करत अहा।
यहोवा सदा कोहान नाहीं रही,
    काहेकि ओका तउ दयालु ही रहब भावत ह।
¹⁹ ओका हम पचन पई फुन दया करि द्या।
    ओका हमरे पापन स छुटकारा पावइ द्या।
    उ हमरे पापन क दूर गहिर सागरे मँ लोकाइ देब्या।
²⁰ याकूब बरे तू फुरइ रहब्या।
    इब्राहीम बरे तू दयालु रहब्या।
    तू अइसी ही प्रतिग्या बहोत पहिले हमरे पुरखन क संग किहे रह्या।