Revised Common Lectionary (Semicontinuous)
कोनो मनखे धरमी नो हंय
9 त फेर हमन का कहन? का हम यहूदीमन आने मन ले बने हवन? बिलकुल नइं! काबरकि हमन पहिली ए दोस लगा चुके हवन कि यहूदी अऊ आनजात जम्मो मनखे मन पाप के अधीन हवंय। 10 जइसने कि परमेसर के बचन म लिखे हवय:
“कोनो धरमी नो हंय, एको झन घलो नइं।
11 कोनो नइं समझंय, कोनो परमेसर के खोज नइं करंय।
12 जम्मो झन भटक गे हवंय
अऊ एक संग ओमन बेकार हो गे हवंय।
कोनो भलई नइं करंय,
एको झन घलो नइं।”[a]
13 “ओमन के टोंटा ह खुले कबर अय,
ओमन के जीभ ह छल कपट के बात करथे।”[b]
“ओमन के होंठ म करैत सांप के जहर हवय।”[c]
14 “ओमन के मुहूं ह सराप अऊ करूपन ले भरे हवय।”
15 “ओमन के गोड़ ह लहू बोहाय बर तेज भागथे,
16 ओमन के डहार म नास अऊ दुरगती हवय,
17 अऊ ओमन सांति के रसता ला नइं जानंय।”[d]
18 “ओमन के आंखी के आघू म परमेसर के डर नइं अय।”[e]
19 हमन जानत हवन कि मूसा के कानून ह जऊन कुछू कहिथे, ओह ओमन ला कहिथे जऊन मन कानून के अधीन हवंय, ताकि हर एक के मुहूं ह बंद हो जावय अऊ जम्मो संसार ह परमेसर के दंड के अधीन रहय। 20 एकरसेति मूसा के कानून ला माने के दुवारा कोनो परमेसर के नजर म धरमी नइं ठहिरंय, पर कानून के जरिये मनखे ह पाप के पहिचान करथे।
Copyright: New Chhattisgarhi Translation (नवां नियम छत्तीसगढ़ी) Copyright © 2012, 2016 by Biblica, Inc.® All rights reserved worldwide.