Psalmi 46:1-8

Biblia Sacra Vulgata

46 In finem, pro filiis Core. Psalmus.

² Omnes gentes, plaudite manibus; jubilate Deo in voce exsultationis:

³ quoniam Dominus excelsus, terribilis, rex magnus super omnem terram.

⁴ Subjecit populos nobis, et gentes sub pedibus nostris.

⁵ Elegit nobis haereditatem suam; speciem Jacob quam dilexit.

⁶ Ascendit Deus in jubilo, et Dominus in voce tubae.

⁷ Psallite Deo nostro, psallite; psallite regi nostro, psallite:

⁸ quoniam rex omnis terrae Deus, psallite sapienter.