A A A A A
Bible Book List

Zacarias 13Ang Pulong Sang Dios (HLGN)

Tinluan ang mga Israelinhon sa Ila mga Sala

13 1-2 Nagsiling ang Ginoo nga Makagagahom, “Sa sina nga adlaw, pagabuksan ang tuburan para sa mga kaliwat ni David kag sa mga pumuluyo sang Jerusalem, sa pagtinlo sa ila sa ila nga sala kag pagkahigko. Dulaon ko ang mga dios-dios[a] sa duta sang Israel kag indi na gid sila madumduman pa. Pahalinon ko sa Israel ang indi matuod nga mga propeta kag ang malaot nga mga espiritu nga nagagahom sa ila. Kag kon may ara pa nga magpakapropeta, ang iya amay kag iloy magpaandam sa iya nga dapat siya patyon, tungod kay nagasugid siya sang butig kag nagasiling pa siya nga ina halin sa Ginoo. Kon magpakapropeta pa siya, bun-on siya sang iya amay ukon iloy. Ina nga mga propeta mahuy-an sa ila ginasiling nga palanan-awon. Indi na sila magsuksok sang bayo sang propeta agod magpangdaya kundi magasiling sila, ‘Indi ako propeta. Mangunguma ako, kag amo ini ang akon trabaho halin sang bata pa ako.[b] Kon may magpamangkot sa ila parte sa mga pilas[c] sa ila lawas, ang sabat nila, ‘Nakuha ko ini sa balay sang akon mga abyan.’”

Mapatay ang Manugbantay sang mga Karnero kag Magalapta ang Iya mga Karnero

Nagsiling ang Ginoo nga Makagagahom, “Ipreparar ang espada! Patya ang akon manugbantay sang mga karnero,[d] nga akon kabulig. Patya siya kag magaalaplaag ang mga karnero, ang akon kubos nga katawhan. Kag ini sila silutan ko. Mapatay ang duha sa tatlo ka bahin[e] sang katawhan sang bug-os nga duta sang Israel. Ang ikatatlo nga bahin nga nabilin pagatinluan ko pareho sang pilak nga ginapapuraw sa kalayo. Kag tilawan ko sila pareho sang bulawan nga ginatilawan sa kalayo kon puro ukon indi. Magapangamuyo sila sa akon kag pamatian ko sila. Magasiling ako, ‘Sila ang akon katawhan,’ kag magasiling man sila, ‘Ang Ginoo ang amon Dios.’”

Footnotes:

  1. Zacarias 13:1 2 mga dios-dios: sa literal, mga ngalan sang mga dios-dios.
  2. Zacarias 13:5 5 kag ... ako: Indi klaro ang buot silingon sang Hebreo sini.
  3. Zacarias 13:6 6 pilas: Siguro ginahanot nila ang ila lawas sa ila nga pagsimba sa mga dios-dios.
  4. Zacarias 13:7 7 ang akon manugbantay sang mga karnero: siguro ang buot silingon, ang akon pinili nga pangulo.
  5. Zacarias 13:8 8 duha sa tatlo ka bahin: sa English, two-thirds.
Ang Pulong Sang Dios (HLGN)

Hiligaynon Bible (Ang Pulong Sang Dios) Copyright © 1996, 2006 by Biblica, Inc.® Used by permission. All rights reserved worldwide.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes