Yobu 18

Mawu a Mulungu mu Chichewa Chalero

⁵ “Nyale ya munthu woyipa yazimitsidwa;
    malawi a moto wake sakuwalanso.
⁶ Kuwala kwa mʼnyumba mwake kwasanduka mdima;
    nyale ya pambali pake yazima.
⁷ Mayendedwe ake amgugu azilala;
    fundo zake zomwe zamugwetsa.
⁸ Mapazi ake amulowetsa mu ukonde
    ndipo akungoyendayenda mu ukondewo.
⁹ Msampha wamkola mwendo;
    khwekhwe lamugwiritsitsa.
¹⁰ Amutchera msampha pansi mobisika;
    atchera diwa pa njira yake.
¹¹ Zoopsa zikumuchititsa mantha kumbali zonse,
    zikutsatira mayendedwe ake onse.
¹² Mphamvu zake zatha chifukwa cha njala,
    tsoka likumudikira.
¹³ Wagwidwa nthenda yoopsa thupi lonse;
    miyendo yake, manja ake, zonse zawola.
¹⁴ Wachotsedwa mʼnyumba imene ankadalira,
    ndipo amukokera ku imfa, mfumu ya zoopsa zonse.
¹⁵ Mʼnyumba mwake zonse zachotsedwamo;
    awazamo sulufule kuti aphe tizirombo ta matenda.
¹⁶ Mizu yake ikuwuma pansi
    ndipo nthambi zake zikufota
¹⁷ Sadzakumbukiridwanso pa dziko lapansi;
    sadzakhalanso ndi chinthu chomutchukitsa mʼdziko.
¹⁸ Amuchotsa pa malo owala ndi kumuponya ku mdima,
    ndipo amupirikitsa pa dziko lonse.
¹⁹ Iye alibe ana kapena zidzukulu pakati pa anthu ake,
    kulibe wotsala kumene iye ankakhala.
²⁰ Anthu akumadzulo adabwa kwambiri ndi tsoka lake;
    anthu akummawa agwidwa ndi mantha aakulu.
²¹ Ndithudi, izi ndiye zimagwera munthu woyipa;
    amenewa ndiye mathero a munthu amene sadziwa Mulungu.”