A A A A A
Bible Book List

Yakob 1Ne Bibliaj Tik Nawat (NBTN)

Naja, Yakob, ne itekitini ne Teut wan ne Tajtzin Yeshu Mawaltijtuk, nikintajpalua ne majtakti-ume tribuj musentalujtiwit!

Shikmatikan wey pakilis, nukniwan, kwak anmutasat iwan ankakeski taejekulis, ika ankimatit ka kwak muejekua ne tayulmatilis, uni kichiwa ka titejchiat nejnejmach. Ne tanejmachselilis ma kipia ne itekiw ken muneki pal anmuchiwat ken muneki wan yejyek, ma inte shimunekikan tatka.

Asu aka ipal anmejemet inte kipia tamatilis, ma kitajtani ne Teut ne kinmaka muchi tay munekit wan te kinhijilwia, wan yawi kipia. Ma kitajtani iwan tayulmatilis. Ma inte kichiwa dudar, ika ká ne kichiwa dudar yaja ken se olaj ipal ne weyat ne mutzejtzelua wan mutamuta iwan ne ejekat. Uni takat ma inte kimati ka yawi kikwi tatka itech Tutajwan; se takat kipia ume iyulu, kweliwi ijtik muchi ne ijiuj.

Ma mumati wey ne tuiknew ká kanawak kwak muajkukia, 10 wan ne kipia wey kwak muchiwa kanawak, ika ken se sakashuchit yawi puliwi: 11 kiskia ne tunal tatutunia wan kiwatzki ne sakat wan ne ishuchiu wetzki wan ne itachialis yektzin panutuka. Ijkiuni ne kipia wey nusan yawi puliwi tik ne inejnemilis.

12 Suertej kipia ne takat ne kiselia taejekulis, ika su muita yek kikwis ne yawal yultuk ne inak ne Teut ka yawit kipiat muchi ne kitasujtat.

13 Ma inte ina aka ne muejekua ka "ne Teut nechejekua", ika ne Teut nian weli muejekua iwan ne te yejyek, nian yaja kiejekua aka. 14 Muchi tejemet techejekua ne tutaelewilis isel kwak techtilana wan techpewia; 15 neman ne taelewilis kipunia ne tateyekchijtuk wan ne tateyekchijtuk kipunia mikilis.

16 Maka shimushijshikukan, nukniwan yektasujtatuk: 17 muchi yek tay techmakat wan muchi tay techtakuliat ken yek, techtemultilia ne Tuteku ipal ne tajtawil ka ikajku, ká ne inte mupata nian muyawalua iekawyu. 18 Yaja techpunij iwan palabraj yekkaya ika kinekik, pal timuchiwat ken ne achtu ipal muchi tay kichijki.

19 Shikmatikan, nukniwan yektasujtatuk: sejse takat ma ijisiwi takaki, ma ishtuna tanutza, ma ishtuna kwalani. 20 Ika ikwalan takat inte kichiwa itamelakchiwalis Teut. 21 Neka nimetzinhilwia ma shiktamutakan muchi tay susul wan tay teyek wan ma shikwikan iwan yulyamanikayu ne palabraj tukatuk ne weli kipalewia ne tuajalmaj.

22 Shimuchiwakan sejse ká kichiwat tay ina ne palabraj, inte semaya takaki wan mushijshikua; 23 ika su se takaki wan te kichiwa ne palabraj, yajane ken se takat ne muishkejketza tik se espejoj: 24 muishkejketzki wan yajki, wan nemanha kielkaw ken yaja. 25 Ká ne tachishtuk tik ne yek tajtuli ipal ne tamakishtilis wan naktuk, tesu ken se takaki wan kielkawa sute se kichiwa itekiw, yaja kipias suertej tik ne tay kichiwa.

26 Asu se kimati ka yaja tayulmatini wan te munenepilpachua sute muyulshijshikua, te tatka ipatiw ne itayulmatilis yajane. 27 Ini tay ne tayulmatilis pupujtuk wan yek ipal ne Teut wan Tuteku: ma tajpia iknupipil wan siwatket ne mikik ishulejyu kwak tajseliat; ma inte kiajkawa ma kisusulwi ne taltikpak.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes