A A A A A
Bible Book List

Wat Jesus Show John 3Hawai‘i Pidgin (HWP)

Fo Da Church Peopo Sardis Side

Den da One I wen see tell me, “Da angel messenja guy I wen send fo help da peopo who come togedda fo church Sardis side, write one letta to him, an say dis: ‘Da One dat stay in charge a da seven spirits dat come from God, an hold da seven stars too, dis wat he tell:

“Eh, I know everyting wat you guys doing! I know dat everybody tell dat you guys stay alive fo real kine! But dass bulai, cuz I know dat you guys stay mahke inside. So, wake up an no go back sleep now! An make strong wat you guys get still yet, cuz litto mo goin mahke. I see dat you guys neva do stuff all da way, da way my God like. So den, rememba how you guys wen take da stuff I wen teach you guys, an you guys wen go all out fo do um. So, stay doing lidat. Come sorry fo da bad kine stuff you guys stay doing now, an no do um no moa. If you guys no wake up, I goin come quick, jalike one steala guy, an you guys no goin know da time I goin show up. But get some peopo ova dea by you guys Sardis side dat stay do wass right an not pilau. Dey da guys dat goin walk wit me an wear clean white kine clotheses, cuz dey get da right fo do dat.

    “Everybody dat fight an win ova da bad kine stuff,
        Dey goin wear clean white kine clotheses lidat.
    I no goin wipe out dea name eva
        From da Book Dat Tell Who Get Godʼs Kine Life fo real!
    I know dea names,
        An I goin tell my Fadda an his angel guys
        Dat dose guys stay my guys.

“If you guys can hear dis, you betta listen an go do wat Godʼs Spirit stay telling da church peopo.” ’ ”

Fo Da Church Peopo Philadelphia Side

Den da One I wen see tell me, “Da angel messenja guy I wen send fo help da peopo who come togedda fo church Philadelphia side, write one letta to him, an say dis: ‘Da One who stay living ony fo God, you can trus him everytime fo tell da trut. He da One dat get da right fo be da King jalike King David. Dass jalike he get King Davidʼs key. Wen he take da key an open da door, no mo nobody can close um. Wen he take da key an close da door, no mo nobody can open um. Dis wat he tell: “I know everyting wat you guys doing. Look! Jalike I wen open one door in front you guys, an no mo nobody can close um. I wen do dat cuz you guys get ony litto bit power still yet, an you guys wen do wat I wen say, an you guys no tell dat you donno who me. Get peopo dat come togedda inside one church, an say dey Godʼs peopo. But dey da Devilʼs peopo fo real. Dey ony bulai. I goin make dem come an go down in front you guys feet. An dey goin find out dat I get love an aloha fo you guys. 10 You guys wen do wat I wen say, an wen hang in dea an no give up. Az why I goin take care you guys wen da big presha come, da kine presha dass goin come on top da whole world, fo check out everybody dat stay down hea. 11 Eh, I coming back pretty soon! Hang in dea, so dat nobody can take away wat you wen win.

12 “Whoeva fight an win,
    I goin make dem strong
    Jalike da main post inside da temple fo my God.
Dey no goin eva leave da temple again!
I goin write my Godʼs name on top dem,
    An da name fo Godʼs big town, da new Jerusalem.
Dat place goin come down from da sky wea God stay.
An I goin write my new name on top dem.

13 “If you guys can hear dis, you betta listen an go do wat Godʼs Spirit stay telling da church peopo.” ’ ”

Fo Da Church Peopo Laodicea Side

14 Den da One I wen see tell me, “Da angel messenja guy I wen send fo help da peopo who come togedda fo church Laodicea side, write one letta to him, an say dis: ‘Da One dat stay true, who tell everyting jalike wen happen so you can trus wat he say, who wen start everyting dat God wen make inside da world, dis wat he say:

15 “I know everyting wat you guys stay doing. You guys not agains God, but same time, you guys not all out fo God! I like mo betta if you guys was all out fo God, o agains him. 16 But you guys stay in da middle. You no care. So I goin bahf you guys outa my mout! 17 You guys tink, ‘Me, I stay rich. I get plenny, an no need notting!’ Auwe! You guys donno still yet dat you all jam up! You guys no mo face, no mo money, no mo clotheses, an no can see!

18 “Now I goin tell you guys wat I like you guys fo do. Fo come rich inside, come by me an get da stuff you guys need. Dass jalike you guys goin buy da bestes kine gold, da kine dat dey put inside da fire fo take out da junk kine stuff. An den you guys come by me an buy white clotheses fo put on, fo take away da shame, cuz jalike you guys no mo clotheses! An den you guys come by me an buy da kine medicine fo put on top yoa eyes so you guys can see fo real kine! 19 Everybody I get love an aloha fo, I tell um wen dey mess up, an I help um fo do da right ting. So, come on, go all out, come sorry, an no do da bad kine stuff no moa. 20 Listen! I stay ova hea, standing outside da door an knocking. Anybody hear my voice, an open da door, I goin go inside his place, an eat wit him, an he goin eat wit me.

21 “Whoeva fight an win,
I goin give dem da right
    fo sit by me wea I stay on top my throne.
Jalike me, I wen win,
an now I stay sit down by my Fadda
    wea he stay on top his throne.

22 “If you can hear dis, you betta listen an go do wat Godʼs Spirit stay telling da church peopo fo do.” ’ ”

Hawai‘i Pidgin (HWP)

Copyright © 2000 by Wycliffe Bible Translators International. All rights reserved

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes