Tay Kichijket 26

Ne Bibliaj Tik Nawat

—Weli titaketza mupanpa.

² —Ipanpa muchi tay inat ne Yudayujmet ka nikchijtuk, nimumati iwan suertej ika ashan niaw niweli ninankilia muishpan, tatuktiani Agripa; ³ keski mas ika taja tikmati ken muwikat ne Yudayujmet wan muchi ne tajtajtanilis. Neka nimutajtawelia ma shinechkaki nejnejmach.

⁴ Kwak nichikitik katka ninemik ka Yerushalem ijtik nutechan, wan muchi ne Yudayujmet kimatit ken nimuwikatuk senpa. ⁵ Yejemet nechishmatit yek kwak pejki wan hasta ashan wan kimatit, su kinekiskiat inat, ka naja ni Parishayuj katka, uni ne sectaj mas uchulnaj ipal ne tutayulmatilis. ⁶ Wan ashan nechchiwat juzgar ipanpa nutejchialis ipal ne sentaketzat tay kichijki ne Teut. ⁷ Muchi ne tribujmet ipal tutechan Israel tekitit katka sujsul, ka tayua wan ka tunal, ika kimatit ka yawi witz. Wan nechtenewat, tatuktiani, ipanpa ini tejchialis. ⁸ Taika anhinat ka inte weli ma kiketza ne Teut ne miktiwit?

⁹ Najasan ninak ka ninemituya pal nikchiwa miak pal niksuma ne itukay ne Nazarayuj Yeshu, ¹⁰ wan yaja tay nikchijki tik Yerushalem, wan nikwikak tzajtzaktuk sujsul miak takamet wan siwatket ipal ne Teut, iwan ne tatuktilis ne nechmakaket ne weypalejmet, wan kwak mumiktiat katka, naja ninak ka nemi yek; ¹¹ wan tik muchi ne kajkalsennemit nikchiwa katka ka muwitekit sejsenpa, wan ka kukujtaketzat, wan sujsul nikwalani katka inwan wan nikintalultia katka hasta tik tepal tejtechan.

¹² Ne weypalejmet nechtekimakatiwit wan nechmakatiwit tatuktilis, wan kwakuni niajki tik Damashek, ¹³ tatuktiani, wan tajkutunal, tik ne ujti, kiski ka ilwikak se tawil mas wey que ne tunal wan nechtawiluj naja wan ne senyawit nuwan, ¹⁴ wan kwak muchi tiwetztiwit talchi, nikakik se nechilwia tik ne Ebrayuj taketzalis:

    "Shaul Shaul, taika tinechtalultia? Uij ma shinechsuma!"

¹⁵ Naja ninak:

    "Ká taja, Tajtzin?"

Ne Tajtzin inak:

    "Naja ni Yeshu, ká ne taja tiktalultia. ¹⁶ Saman shimuketza wan shimutali ejkatuk, ika naja nalnestuk muishpan pal nimetzishpejpena pal nimetzmaka mutekiw wan pal tikinhilwia muchi ka tinechitztuk wan muchi tay niaw nimetzneshtilia. ¹⁷ Naja niaw nimetzmakishtia itech ne chinamit wan ne tejtechan kanka nimetztitania ¹⁸ pal tikinhishpelua, pal kiane ma kiajkawakan ne takumi wan ma muishkwepakan itech ne tawil, wan ma kiajkawakan ne itatuktilis ne Tenewani wan ma muishkwepakan itech ne Teut, pal kikwit tetapupulwilis ipal tay tateyekchijtiwit wan pal nechyulmatit wan nejnemit ijtik ne teujteuchijtuk."

¹⁹ Yajika, tatuktiani Agripa, niktakamatki ne tachialis ipal ne ilwikak, ²⁰ wan nipejki nikinhilwia, achtu tik Damashek, neman tik Yerushalem wan nujme Yudaya wan ijtik ne sejseuk techan, ma muyulpatakan wan ma muishkwepakan itech ne Teut wan ma kichiwakan tay yek pal welit muyulpatat. ²¹ Ipanpa uni, ne Yudayujmet nechitzkijket kwak ninemituya itech ne teupan wan kinekit nechmiktiat. ²² Ne Teut nechpalewij, yajika nikan ninemi hasta ne tunal pal ashan. Nikilwia tay nikmati ne chijchikitik wan ne wejwey, wan te nina tatka sute tay ne inaket ka yawi muchiwa ne taketzanimet, wan Moshe nusan: ²³ ka ne Mawaltijtuk yawi taekua; ka yaja ne achtu pal muyulkwepa kwak miktuk; ka yawi kinawatia ne tukniwan wan ne tejtechan.

—Timele, Pawlo; timelekisa iwan ne wey amamatilis!

—Inte nimele —ina—, yek Festus, sute nina tay tejkia wan nutzuntekun nemi yek. ²⁶ Ika niknutza melaknaj ne tatuktiani wan yaja kimatiaya tay muchi ini, ika nina ka te tatka pal muchi ini ichtaka ipal, ika te muchijki tik se tzinkal! ²⁷ Tatuktiani Agripa, tikyulmati ne taketzanimet! Nikmati ka tikinyulmati.

—Chiupi kineki pal tinechkwepa Cristianoj!

—Niktajtaniskia ne Teut ma shimuchiwakan, ma kineki chiupi ma kineki wey, taja wan muchi ne nechkakit ashan, kenha ken naja, sema ma te shinemikan ijilpituk ken naja.

—Ini takat te kichiwa tatka pal ma mumikti nian ma muilpi.

—Weliskia mumakishtia yajini su te inatuskia ka kineki ma kichiwa juzgar ne taltikpaktuktiani.