A A A A A
Bible Book List

Taneshtilis 7Ne Bibliaj Tik Nawat (NBTN)

Tipan nikitak nawi tanawatiani ejejkatuk tik ne nawi itzun ne taltikpak kipachuat ne nawi ejekat ipal ne taltikpak pal se ejekat inte yawi kishpitza ne tal nian ne at nian muchi ne kwajkwawit.

Wan nikitak ukse tanawatiani kutejku kan kisa ne tunal, wan kipiatuya ne isaj ne Teut yultuk. Wan se kintzajtzalij ne nawi tanawatiani ne kinmakaket ma welit kijtakuat ne tal wan ne at, ina: "Maka shikchiwili tatka ne tal nian ne at nian ne kwajkwawit hasta ma tiktalilikan ne tekitinimet ipal ne tuTeut se sajti pak ne inkwatapal."

Wan nitakakik keski ne musajtalilijket: nemiket sentzunti unpual wan nawi mil ne musajtalilijtiwit ipal muchi ne trijtribuj ipal ipilawan Israel:

ipal itribuj Yuda, majtakti-ume mil musajtalilijket;

ipal itribuj Reuben, majtakti-ume mil;

ipal itribuj Gad, majtakti-ume mil;

ipal itribuj Asher, majtakti-ume mil;

ipal itribuj Naptalim, majtakti-ume mil;

ipal itribuj Manashe, majtakti-ume mil;

ipal itribuj Shimon, majtakti-ume mil;

ipal itribuj Lewi, majtakti-ume mil;

ipal itribuj Isakar, majtakti-ume mil;

ipal itribuj Zebulun, majtakti-ume mil;

ipal itribuj Yosep, majtakti-ume mil;

ipal itribuj Ben-Yamin, majtakti-ume mil musajtalilijket.

Tipan nitachishki wan nemik se wey miaktal inte aka weli kipua ipal muchi ne tejtechan, trijtribuj, tajtal wan tajtaketzalis ejejkatuk ishpan ne kuijpal wan tik itachialis ne ichkakunetzin ijtik ijistak wipil iwan pajpalmaj ijtik inmejmey, 10 wan tzajtzit:

"Techmakishtiat ne tuTeut ne muetztuk ijpak ne kuijpal wan ne ichkakunetzin."

11 Wan muchi ne tanawatianimet kiyawalujket ne kuijpal, ne noymet wan ne nawi tay yujyultuk; wan mutamutaket talchi iishpan ne kuijpal wan mutankwaketzket iishpan ne Teut 12 wan inat:

"Amen. Ma kipia ne tuTeut ne tayektenewalis wan ne respetoj wan ne itajpal pal senpa wan senpa. Amen."

13 Wan nankilij se pal ne noymet, yaja nechilwia: "Ini ká mutakentijtiwit ijtik inwijwipil istak, ká yejemet wan kanka walajtiwit?" 14 Wan nikilwij: "Tajtzin, anka taja tikmati." Wan nechilwij:

"Yejemet ne kiseliat witzet wey uijkayu, wan kiapaktiwit ne inwijwipil wan kikweptiwit ijistak tik ne iesyu ne ichkakunetzin. 15 Yajika nemit iishpan ne ikuijpal ne Teut wan tekitit ipal ka tunal wan ka tayua tik ne iteupantzin, wan ne muetztuk ijpak ne kuijpal kipia ne ikal intzalan. 16 Intea yawit mayanat, wan intea yawit amikit, nian yawit nakat itan ne tunal nian mitunit, 17 ika ne ichkakunetzin tatajku ne kuijpal tajpias wan kinwikas itech ne ajat yultuk, wan ne Teut kiwatzas muchi ne inhishayu tik ne inhijish."

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes