Taneshtilis 14
Ne Bibliaj Tik Nawat
14 Wan nitachishki wan nikitak ne ichkakunetzin ejkatuk ijpak Tziontepet, wan iwan nemituyat se-tzunti-unpual-nawi-mil ne kipiatuyat ne itukay wan ne itukay ne iteku tajtawawasujtuk ijpak ne inkwajkwatapal. 2 Wan nikakik taketza tik ne ilwikak ne mukaki ken wejwey at wan ken wey tikwini, wan ne tay nikakik mukaki ken guitarrajtzutzunanimet kitzutzunat ne inguijguitarraj, 3 wan takwikat ken se yankwik takwikalis iishpan ne kuijpal wan inhishpan ne nawi tay yujyultuk wan ne noymet, wan te aka weli mumachtia ne takwikalis asunte ini sentzunti-unpual-nawi-mil ne mukujtiwit itech ne taltikpak.
4 Yejemet ne inte mususulwijtiwit iwan siwatket ika takapipiltzitzin. Yejemet ne yawit ipan ne ichkakunetzin nujme yaja yawi. Yejemet ká ne Teut wan ne ichkakunetzin kinkujtiwit itech ne ajachtu takat, 5 wan tik ne inten inte muajsi nian se sanka; inte kipiat nian se inpelech.
6 Wan nikitak ukse tanawatiani patani tik itajku ne ilwikak, ne kipiatuya se yeknawatilis ipal senpa pal kinyeknajnawatia ne nemit ijpak ne tal wan muchi ne tejtechan wan trijtribuj wan tajtaketzalis. 7 Yaja tzajtzi wan ina:
"Shiktakamatikan ne Teut wan shinakan ka wey, ika ajsik ne horaj ipal ne ijuicioj, wan shimutankwaketzakan iishpan ne kichijki ne ilwikak wan ne tal wan ajat wan ajapunian."
8 Wan ukse tanawatiani walaj tipan ina:
"Wetzkia, wetzki ne wey Babelonia, ne kichijtuk ka muchi ne tejtechan kiunit ne atata ipal ne kwalan ipal ne itatzinhejenchiwalis."
9 Wan ukse tanawatiani, ne yey, walaj tzajtzi ka ipan, ina:
"Asu aka mutankwaketza iishpan ne tekwani wan ne itachialis wan kikwi se wawasujtuk ijpak ne ikwatapal o ijpak ne imey, 10 yaja nusan yawi kiuni ne atata ipal ne ikwalan ne Teut ne muekchijtuk iwan muchi itajpal tik ne atiluni ipal ne ikwalan, wan yawi chichinaka ijtik tit wan azufrej tik itachialis ne itajtanawatiani ne Teut wan tik itachialis ne ichkakunetzin; 11 wan ne ipukyu ne inchichinakalis pal senpa wan senpa yawi tejku, wan te yawit musewiat nian ka tunal nian ka tayua ne mutankwaketzat iishpan ne tekwani wan ne itachialis, wan su aka kikwi ne ikwikwil ne itukay. 12 Nikan nemi ne intanejmachselilis ne tayulmatit, ne tajpiat tay tatuktij ne Teut wan kiyulmatit Yeshu."
13 Wan nikakik se tik ne ilwikak ina: "Shitajkwilu: Kipiat suertej ne mikinimet ne ashan yawit mikit ipanpa ne Tajtzin. Ijkia, ina ne Ijiutzin, pal welit musewiat kwak kujkutiat, ika ne intejtekiw yawit nakat inwan."
14 Wan nitachishki wan nikitak se mishti istak, wan muetztuk ijpak ne mishti se muita ken ne Itelpuch ne Takat, ne kipia ijpak ne itzuntekun se yawal ipal teukwit, wan tik ne imey se machej tamej. 15 Wan ukse tanawatiani kiski tik ne teupantzin kitzajtzalia ne muetztuk ijpak ne mishti: "Shikwi ne mumachej wan shitapishka, ika ajsik ne horaj pal titapishkat ika waktuka ne tapishkal."
16 Wan ne muetztuk ijpak ne mishti kishtij ne imachej wan pejki tapishka, wan mupishkak ne tal.
17 Wan kiski ukse tanawatiani ijtik ne teupantzin tik ne ilwikak, ne kipiatuya nusan yaja se machej tamej. 18 Wan kiski ukse tanawatiani itech ne tikashit ne kipia tatuktilis ijpak ne tit, wan kitzajtzalij ne kipiatuya ne machej tamej ina: "Shikwi ne mumachej tamej wan shikululu ne igajgajoj ne shukumekat ipal ne tal, ika uksituka ne itakil." 19 Wan ne tanawatiani kishtij ne imachej wan pejki tekiti wan kiululuj ne shukumekat ipal ne tal, wan kitamutilij ne shaput kan muishtia ne iayu ne shukumekat, yaja ne shaput ipal ne ikwalan ne wey Teut. 20 Wan taksaket ijpak ne shukumekat ne tatenpan ne techan, wan kiski esti kan taksaket hasta ne intejtentepusti ne caballojmet, wan ne lagoj ajsik hasta yey tzunti kilometroj.
Ne Bibliaj Tik Nawat · © 2008, 2012 Jan Morrow