Sprejchwead 7

Reimer 2001

7 Mien Sän, hool miene Wead, un doo mien Aunkommendeare bewoare enn die.

² Hool mien Aunkommendeare un Läw; un mien Jesats soo aus daut Med fonn en Uag.

³ Binj dee opp diene Fingasch; schriew dee dol opp diene Hoat Tofle.

⁴ Saj to Weisheit, Du best miene Sesta; un nan Festentnis dien Frintschoft;

⁵ soo daut dee die kjenne wajch hoole fonn dee framde Fru, fonn dee Framde met schmeijchel Wead.

⁶ Dan ekj kjikjt derjch mien Splätetun, no daut Fensta fonn mien Hus,

⁷ Un sach mank dee Eenfache; ekj bekjikjt mank dee Säns en junja Maun dee eenfeltijch wea,

⁸ dee derjch dee Gauss jinkj dijcht bie äare Akj; un hee jinkj dän Wajch no äa Hus;

⁹ bie Tweediesta, oppenowent; auset Schwoat un Nacht Diestanis wea.

¹⁰ Un see, ne Hua am to trafe, un en bewoadet Hoat;

¹¹ See es lud en hoatnackijch; äare Feet bliewe nijch enn äa eajnet Hus;

¹² nu es see bute, nu enn dee Gausse; un see luat bie jieda Akj;

¹³ un see jript am un kusst am; see moakt äa Jesejcht hoat un sajcht to am,

¹⁴ Opfa un Fräd Opfa sent bie mie, fonndoag ha ekj mien Fespräakje betolt;

¹⁵ un soo kjeem ekj rut die to trafe; earnstlijch dien Jesejcht to seakje; un ekj ha die jefunge;

¹⁶ Ekj ha miene Benkj bedakjt, met striepjet Zeijch fonn Iejiptischet Leiwent;

¹⁷ Ekj ha mien Bad met Mir, Aloe un Kerneel bespretst;

¹⁸ Komm, wel wie onns felle met Leew bott dän Morje; wel wie onns fejneaje met Hauje.

¹⁹ Dan mien Maun es nijch tus, hee es wajch jegone, wiet auf;

²⁰ Hee haft ne Tausch met Selwa enn siene Haunt jenome; he woat trigj kome wan daut Follmon es.

²¹ Met äare fäl Wead muak see am toojäwe; see deed am bedwinje met daut Schmeijchle fonn äare Leppe.

²² Hee jeit ar fuats hinjaraun, soo aus en Oss no dee Schlachtbenkj jeit; oda soo aus eena dee enn Kjäde jeit no daut Febätrunj fonn en Noa;

²³ bott en Boagefiel am traft derjch sien Läwe; soo aus en Foagel pienijch no dee Schlenj rant, un weet nijch dautet fa siene Seel es.

²⁴ Nu dan, horjcht no mie, O Säns; un jäft Acht opp miene Wead.

²⁵ Lot dien Hoat nijch auntsied dreihe no äare Wäaj; doo nijch erre enn äa Stijch.

²⁶ Dan fäl sent dee, dee fewunt sent worde derjch ar; un fäl dee ommjekome sent.

²⁷ Dee Scheol Wäaj sent enn äa Hus, dee rauf leide no dee Doodje äare Stowe.