Sprejchwead 9  Reimer 2001

9 Weisheit haft äa Hus jebut; see haft äare säwen Stendasch utjekjoaft;

² see haft äa Schlachtfee jeschlacht; see haft äa Wien ennjereat; see haft dän Desch oppjesat.

³ See haft äare Deenstmäakjes rut jeschekjt; see schrijcht fonn dee hejchste Städe enne Staut;

⁴ Du Eenfeltja, lot am hia enenn dreihe; un see sajcht to däm dee oone Hoat es:

⁵ Komm un doo fonn mien Broot äte, un drink fonn mien Wien dee ekj ennjereat ha;

⁶ Felot dee Noare un läw; un go enn dän Festentnis Wajch.

⁷ Wäa en Spatta femone deit kjrijcht Schaund fa sikj selfst; un wäa en beesa Maun dodle deit, kjrijcht ne Plak opp sikj.

⁸ Doo en Spatta nijch dodle, sest woat hee die hausse, doo en weisa Maun dodle, un hee woat die leef ha.

⁹ Jeff to däm weisa Maun, un hee woat noch weisa senne; doo en jerajchta Maun unjarejchte, un hee woat toonäme enn leare.

¹⁰ Däm Herr Gott ferjchte es dee Aunfank fonn Weisheit, un däm Heilja kjane es Festentnis.

¹¹ Dan derjch mie sent diene Doag femeat, un dee Joare fonn dien Läwe woare meeha senne.

¹² Wan du Weis best, dan woascht fa die selfst Weis senne; oba wan du feachte deist, dan woascht du daut auleen droage.

¹³ Ne noarische Fru es lud; dee es oonbedocht un weet nuscht.

¹⁴ Dan see set bie dee Däa enn äa Hus, enn ne Set enn dee huage Städe enne Staut;

¹⁵ dän aun to roope dee doa febie gone; dee jlikj enn äare Wäaj gone;

¹⁶ dee Eefeltje, lot däm hia enenn dreihe; en dee, dee nich en Hoat haft, sajcht see to am:

¹⁷ Jestolne Wotasch sent seet, un Broot daut emm Jeheeme jeäte woat es auanjenäm.

¹⁸ Oba hee weet nijch daut dee Doodje doa sent; siene Jast sent enn daut Deepet fonne Hal.