Salmo 72

Ang Salita ng Dios (Tagalog Contemporary Bible)

72 O Dios, ituro nʼyo po sa hari ang iyong pamamaraan sa paghatol at katuwiran,
² para makatarungan siyang makapaghatol sa inyong mga mamamayan, pati na sa mga dukha.
³ Sumagana sana ang mga kabundukan upang mapagpala ang inyong mga mamamayan dahil matuwid ang hari.
⁴ Tulungan nʼyo siyang maipagtanggol ang mga dukha
    at durugin ang mga umaapi sa kanila.
⁵ Manatili sana siya^[a] magpakailanman,
    habang may araw at buwan.
⁶ Maging tulad sana siya ng ulan na dumidilig sa lupa.
⁷ Umunlad sana ang buhay ng mga matuwid sa panahon ng kanyang pamumuno,
    at maging maayos ang kalagayan ng tao hanggang sa wakas ng panahon.
⁸ Lumawak sana nang lumawak ang kanyang kaharian,^[b]
    mula sa ilog ng Eufrates hanggang sa pinakadulo ng mundo.^[c]
9 Magpasakop sana sa kanya ang mga kaaway niyang nakatira sa ilang.
¹⁰ Magbigay sana ng mga kaloob sa kanya ang mga hari ng Tarshish,
    ng malalayong isla, ng Sheba at Seba.
¹¹ Magpasakop sana ang lahat ng hari sa kanya
    at ang lahat ng bansa ay maglingkod sa kanya.
¹² Dahil tinutulungan niya ang mga napabayaang dukha
    na humingi ng tulong sa kanya.
¹³ Kahahabagan niya ang mga dukha at nangangailangan at silaʼy kanyang tutulungan.
¹⁴ Ililigtas niya sila sa mga malulupit at mapang-api dahil para sa kanya, ang buhay nilaʼy mahalaga.
¹⁵ Mabuhay sana ang hari nang matagal.
    Sanaʼy mabigyan siya ng ginto mula sa Sheba.
    Sanaʼy idalangin palagi ng mga tao na pagpalain siya ng Dios.
¹⁶ Sumagana sana ang ani sa lupain kahit na sa tuktok ng bundok, katulad ng mga ani sa Lebanon.
    At dumami rin sana ang mga tao sa mga lungsod,
    kasindami ng damo sa mga parang.
¹⁷ Huwag sanang malimutan ang pangalan ng hari magpakailanman, habang sumisikat pa ang araw.
    Sa pamamagitan sana niya ay pagpalain ng Dios ang lahat ng bansa,
    at sabihin sana ng mga ito na siyaʼy pinagpala ng Dios.
¹⁸ Purihin ang Panginoong Dios, ang Dios ng Israel,
    na siyang tanging nakagagawa ng mga bagay na kamangha-mangha.
¹⁹ Purihin ang kanyang dakilang pangalan magpakailanman!
    Mahayag sana sa buong mundo ang kanyang kaluwalhatian.
    Amen! Amen!