Salmo 70

Ang Salita ng Dios (Tagalog Contemporary Bible)

70 Panginoong Dios,
    iligtas nʼyo ako at kaagad na tulungan.
² Mapahiya sana at malito ang mga nagnanais na mamatay ako.
    Magsitakas sana na hiyang-hiya ang mga nagnanais na akoʼy mapahamak.
³ Mapaatras sana sa kahihiyan ang mga kumukutya sa akin.
⁴ Ngunit labis sanang magalak sa inyo ang mga lumalapit sa inyo.
    Ang lahat sana ng nagnanais ng inyong pagliligtas ay laging magsabi, “Dakila ka, o Dios!”
⁵ Ngunit ako, akoʼy dukha at nangangailangan.
    O Dios, agad nʼyo po akong lapitan!
    Kayo ang tumutulong sa akin at aking Tagapagligtas.
    Panginoon, agad nʼyo po akong tulungan.