Salmo 67

Ang Salita ng Dios (Tagalog Contemporary Bible)

67 O Dios, kaawaan nʼyo kami at pagpalain.
    Ipakita nʼyo sa amin ang inyong kabutihan,
² upang malaman ng lahat ng bansa ang inyong mga pamamaraan at pagliligtas.
³ Purihin ka sana ng lahat ng tao, O Dios.
⁴ Magalak sana ang lahat ng tao at umawit ng papuri sa inyo,
    dahil sa makatarungan nʼyong paghahatol at pagpapatnubay sa lahat ng bansa.
⁵ O Dios, purihin sana kayo ng lahat ng bansa.
^6-7 Mag-ani sana ng sagana ang mga lupain.
    Nawaʼy pagpalain nʼyo kami, O Dios, na aming Dios.
    At magkaroon sana ng takot sa inyo ang lahat ng tao sa buong mundo.