A A A A A
Bible Book List

Roma 8Ne Bibliaj Tik Nawat (NBTN)

Ne tunakayu wan ne Ijiutzin

Ashan tel, ne nemit itech ne Mawaltijtuk Yeshu te yawit muchiwat juzgar pal ina ka te yejyek, ika ne itajtuli ne Ijiutzin ne yultuk itech ne Mawaltijtuk Yeshu yawi metzmakishtia itech ne itajtuli ne tateyekchiwalis wan ne mikilis. Ika ne tay ne tajtuli te weli ipanpa ne ikukulis ne tunakayu, ne Teut ijkia: kituktij ne ikunew tik itachialis tunakayu tateyekchiwani, wan ipanpa tateyekchiwalis inak ka te yek ne tateyekchiwalis ijtik ne tunakayu, pal ma yekawi ijtik tejemet ne tay yek ipal ne tajtuli, ika te timuwikat ken tunakayu sute ken Ijiutzin.

Ká ne tikchiwat ken tunakayu, techajwiak tay ipal tunakayu; ká ne ken Ijiutzin, tay ipal ne Ijiutzin. Ne tanekilis ipal ne tunakayu, mikilis. Ne tanekilis ipal ne Ijiutzin, yulkwilis wan nejmachnemilis. Ika ne tanekilis ipal ne tunakayu te ipal Teut, ika te kitakamati ne itajtuli ne Teut, nian weli. Ne muwikat ken innakayu, te welit kiwelmatit Teut. Anmejemet inte nemit ken anmunakayu, asunte ken Ijiutzin, asu muchantia Iijiutzin Teut ijtik anmejemet. Asu se inte kipia Iijiutzin ne Mawaltijtuk, yaja inte ipal. 10 Su nemi ne Mawaltijtuk ijtik anmejemet, ne anmunakayu miktuk ipanpa tateyekchiwalis; ne Ijiutzin yultuk ipanpa tamelakchiwalis. 11 Su ne Iijiutzin ipal ká ne kiyulkwij ne Yeshu kwak miktuk muchantia ijtik anmejemet, ká ne kiyulkwij ne Mawaltijtuk kwak miktuk nusan yawi kiyulkwepa ne anmumijmikini ipanpa ne Ijiutzin ne muchantia ijtik anmejemet.

12 Yajika tel, nukniwan, te tikwikiliat ne tunakayu ne yultuk ken tunakayu, 13 ika su anyujyultuk ken anmunakayu, san anmikisket. Su iwan ne Ijiutzin ankimiktiat ne tay kichijtuk anmuweyka, anyawit yujyultuk. 14 Ika muchi ká muwikat iwan ne Iijiutzin Teut, ipilawan Teut. 15 Inte ankikwijtiwit ne iijiu ipal tekitilis pal anmukwepat majmawit, ankikwijtiwit ne iijiu pal ma metzinkwi ken ipilawan. Yajika titzajtzit: Tuteku! 16 Ne Ijiutzin yajasan ina kenha ken ne tuijiu ka tiikukunew Teut. 17 Su tiikukunew, nusan tiawit tikpiat tay ipal ne Tuteku Teut, kenha ken ne Mawaltijtuk, su titaekuat ken yaja pal kiane nusan tiawit timuweychiwat ken yaja.

Taekulis wan tayulmatilis

18 Nikishketza ka tay ne tiwelit titaekuat ashan te tatka su tikelnamikit ken yawi tzitzinaka kwak yawi muneshtia pal tikitat. 19 Ika ne tejchialis ipal muchi tay muchijtuk kichia ne taneshtilis ipal ne ipilawan ne Teut. 20 Muchi tay muchijtuk kitakamati ne tay te tatka ipatiw, te ika kineki, sute ipanpa ká ne kituktij iwan tejchialis, 21 ika nusan muchi tay muchijtuk yawi mumakishtia itech ne tekitilis ipal ne puliwilis wan yawi tzitzinaka tik ne tamakishtilis ipal ne ikukunew ne Teut. 22 Ika tikmatit ka muchi tay muchijtuk ijiumiki wan kikinaka iwan takukulis hasta ashan: 23 inte sema ne sejseuk, nusan tejemetsan ne tikpiat ne achtu ipal ne Ijiutzin; tejemet nusan tijiumikit ika titejchiat hasta ma techchiwa ipilawan wan ma mumakishtikan ne tujtuweyka. 24 Ika ne tejchialis techpalewia. Asu tikitat tay ne tikchiat, inte uni tejchialis, ika asu tikitat, tay ne tikchiat? 25 Asu tikyulmatit tay ne inte tikitat, kwakuni titejchiat iwan tanejmachselilis.

26 Ne Ijiutzin nusan techpalewia kenhaya kwak tisutawat, ika melka te tikmatit tay tiktajtaniskiat ne Teut ken muneki, ne Ijiutzin isel tajtani tupanpa: yaja ijiumiki pal taneshtia tay ne te aka weli ina. 27 Ká ne tatejtemua ijtik tuyujyulu, yaja kimati tay kineki ne Ijiutzin ika tajtani ipanpa ne yejyek ken kielewia ne Teut.

28 Tikmatit ka ipal ká ne kitasujta ne Teut, ipal ká ne munutztuk ipal ne itajshitilis, muchi tekiti ipal tay yek. 29 Ika ká ne yaja kimatiaya achtu, nusan tachtutuktijtuk ma muchiwakan ken ne itachialis ne ikunew, pal kiane yaja yawi muchiwa ne achtupunijtuk ijtik miak tekniwan. 30 Ká ne yaja kiachtutuktij, nusan kinutzki; wan ká ne kinutzki, nusan kimelakchijki; wan ká ne kimelakchijki, nusan kiweychijki.

Ká weli techkupewa itech ne itetasujtalis ne Mawaltijtuk?

31 Tay tinasket tel pal tinankiliat? Su ne Teut yawi techpalewia, ká weli techchiwilia tatka? 32 Yaja ká hasta temakak ne ikunew tupanpa muchi, ken inte yawi techtakulia muchi tay timunekit? 33 Ká yawi kintenewa ne ijishpejpentuk ipal Teut, su Teut ne kinhilwia yejyek? 34 Ká yawi ina ka yejemet te yejyek, su tajtani tupanpa ne Mawaltijtuk Yeshu ká mikik — mas yek, ká muketzki — wan ká mutalia ka imayekkan ne Teut? 35 Ká tel weli techkupewa itech ne itetasujtalis ne Mawaltijtuk? Anka pejpenaj, o ijiumikilis, o taejekulis, o mayan, o petztikayu, o uijkayu, o espadaj? 36 Ken muijkwilujtuk:

    "Ka mumaku techmiktiat muchi ne tunal, techitztiwit ken ichkamet ipal temiktilis."

37 Melka uni, senpa tiwelitiwit ipanpa yaja ká techtasujtak. 38 Ika nina ka nian mikilis, nian nemilis; nian tanawatianimet, nian tatuktianimet; nian ne ashkan, nian ne musta; nian ne sujsul welit; 39 nian wejkapan, nian miktan; nian seuk tay muchijtuk welis techkupewa itech ne itetasujtalis ne Teut itech ne Mawaltijtuk Yeshu, tutajtzin.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes