Add parallel Print Page Options

Ne teulyujmakalis

Tay tinasket tel? Anka tiawit tinakat titateyekchiwat pal ma tepewi ne teutasujtalis? Intesu! Su timiktiwit ipal ne tateyekchiwalis, ken tiawit timukwepat tiyujyultuk ijtik yaja?

Inte ankimatit ka muchi tejemet ká timumakaket ulyuj tik ne Mawaltijtuk Yeshu timuulyujmakaket tik ne imikilis? Timusentalpachujket iwan, ika timumakaket ulyuj tik ne mikilis, pal kiane kenha ken muyulkwepki ne Mawaltijtuk kwak miktuk, ipanpa ne itawilyu ne Teteku, nusan tejemet tiawit tiyulyankwikisat, ika su tisentakatit iwan ne tachialis ipal ne imikilis, kenhaya tiawit timuchiwat iwan ne ipal ne imuyulkwepalis.

Tikmatikan ka ne takat o siwat ká tupal katka ikman musencruzpiluj iwan, pal puliwi ne iweyka ne tateyekchiwalis, ma intea keman titekitikan ipal ne tateyekchiwalis. Ika ká ne mikik mumelakchijtuk, intea kipia tateyekchiwalis.

Asu timiktiwit iwan ne Mawaltijtuk, tikmatit ka nusan tiawit tiyujyultuk iwan, ika tikmatit ka kwak ne Mawaltijtuk muketzki kwak miktuk, intea miki: ne mikilis intea weli tatuktia ijpak. 10 Ika ken mikik, mikik ipal ne tateyekchiwalis pal senpa; hasta kan yultuk, yultuk ipal ne Teut. 11 Anmejemet kenhaya, shikishketzakan ka anmiktiwit ipal ne tateyekchiwalis, melka anyujyultuk ipal ne Teut itech ne Mawaltijtuk Yeshu.

12 Yajika, ma inte tatukti ne tateyekchiwalis ijtik ne anmuweyka ne yawi puliwi, ma inte shiktakamatikan ne itajtaelewilis. 13 Wan maka shikishpanukan ne tajtakutun ipal ne anmuweyka ken tajtaiwan ipal ne inteyek. Shikishpanukan ipal ne Teut, ken sejse miktiwit wan muyulkweptiwit, wan ne anmuwejweyka ken tajtaiwan ipal tamelakchiwalis ipal ne Teut. 14 Ika ne tateyekchiwalis inte yawi tatuktia anmujpak, ika inte annemit itan tajtuli sute itan teutasujtalis.

Tejemet titekitinimet ipal ne tamelakchiwalis

15 Tay tinasket tel? Anka tiawit titateyekchiwat ika inte tinemit itan tajtuli asunte itan teutasujtalis? Intesu! 16 Inte ankimatit ka su anmuishpanuat ken itejtekitini se, nemi pal ankitakamatit ne anmutekuyu? Su anmutekuyu ne tateyekchiwalis, yawi metzintashtawa iwan mikilis. Su ne tetakamatilis, iwan tamelakchiwalis. 17 Tashtawi! Ka melka anhitejtekitini katka ne tateyekchiwalis, ankitakamattiwit iwan anmuyulu ne tamachtilis ne iwan metzinmakaket, 18 wan metzinmakishtijket itech ne tateyekchiwalis wan anmuchijket itejtekitini ne tamelakchiwalis. 19 Ken takat nina, ipanpa ne ikutialis ne anmunakayu. Ika kenha ken ankishpanujtiwit ne anmuweyka ken tekitinimet ipal tay susul wan tay inte nemi yek, ma muchiwa tay inte nemi yek, ashan kenhaya ankishpanuat anmuweyka ken tekitinimet ipal ne tamelakchiwalis, ma muchiwa tay ipal ne Teut.

20 Ika kwak anhitejtekitini katka ne tateyekchiwalis, inte annemituyat itan ne tamelakchiwalis. 21 Kiane tel, katiawel ne itakil ne ankipishket? Ashan anhishpinawat ipanpa, ika muchi uni tami kwak timikit. 22 Ashan intea annemit itan ne tateyekchiwalis, anhitejtekitini ne Teut, wan ankipiat ne anmutakil ipal tay ipal Teut, wan anyawit tamit yujyultuk senpa. 23 Ika ipatiw ne tateyekchiwalis ne mikilis; ne itetakulis ne Teut yaja ma tiyujyultuk senpa itech ne Mawaltijtuk Yeshu, tutajtzin.