A A A A A
Bible Book List

Roma 3Ne Bibliaj Tik Nawat (NBTN)

Kwakuni, tay kipia ne Yudayuj tay yek, wan tay ipatiw ne tayawaltekilis? Yaja sujsul wey! Achtu: ika yejemet kikwijket ne ipajpalabraj ne Teut pal tajpiat. Melka uni, sejse inte tajpishket. Anka yajika yawi mupulua ne ipromesaj ne Teut? Tesu keman! Tinakan mas yek ka ne yekkaya Teut, wan muchi ne takamet sankataketzat! Ken muijkwilujtuk:

    "Pal muilwitia ka tiyek tik mupajpalabraj wan pal tiweli kwak metztenewat."

Ashan, su tay ne tikchiwat tay teyek kilwitia ka yek ne Teut, tay tinasket? Anka ne Teut inte yek ika kwalani? Nina ken takat. Tesu keman! Su te, ne Teut ken yawi kichiwa juzgar ne taltikpak? Asu ne tejkia ipal ne Teut muchiwa mas wan yaja tzitzinaka ijtik ne nusanka, taika nechtenewat ken tateyekchiwani kenhayuk? Wan te ken kukujtaketzat tupanpa wan sejse inat ka tejemet tinat: "Tikchiwakan tay teyek, pal witz ne tay yek"? Melawak ma kichiwakan juzgar.

Muchi ne takamet tateyekchiwat

Tay tina? Techpalewia? Te tatka! Tikilwitijtiwita ka ne Yudayujmet wan ne Greciajtakamet muchi nemit itan tateyekchiwalis. 10 Ken muijkwilujtuk:

    "Nian se yulmelawak.

11     Nian se tamati.

    Nian se kitemua ne Teut.

12     Muchi kiajkawtiwit ne ujti.

    Nian aka kipia ipatiw.

    Nian sechin kichiwa tay yek.

    Nian se!

13     Ne intuskak se shaput tapujtuk.

    Iwan innenepil tashijshikuat.

    Itan intenshipal nemi pajchilmekat.

14     Pusuni n' inten iwan maldicion wan chichikayu.

15     Mutaluat inhijikshi pal kishiniat esti.

16     Tik ne ujujti kan yawit mukeluna wan kwajkwalu se,

17     wan te kishmatit ne ujti ipal nejmachnemilis;

18     te kanaj mawi ipal Teut ishpan inhijish."

19 Tikmatit ka muchi tay ina ne tajtuli, kinhilwia ne takamet ne nemit itan ne tajtuli, pal ma mutzakwakan itejten muchi wan ma muchiwakan muchi tejtenejtuk iishpan ne Teut, 20 ika iwan ne tajtuli nian se weli ina ka yek; iwan ne tajtuli semaya tiwelit tikishmatit tay ne teyek.

Sema ne tayulmatilis weli techpalewia

21 Ashan muneshtijtuk ne itamelakchiwalis Teut, inte ijtik ne tajtuli asunte ukse ujti tay ipanpa taketzat ne tajtuli wan ne taketzanimet: 22 ne itamelakchiwalis Teut ne witz ika tikyulmatit Yeshu Mawaltijtuk. Yaja ipal muchi ne tayulmatit, inte sema sejse wan sejse inte. 23 Ika muchi tateyekchijtiwit wan kinchiwa faltaj ne itawilyu ne Teut, 24 ma inakan ka yejyek melka inte kipiat taika, ipanpa ne itetasujtalis, ika kinmakishtia ne Mawaltijtuk Yeshu, 25 ká ne Teut techtalilij ken se mutemaka wan miki ka tumaku, ijtik tayulmatilis, pal kilwitia ne itamelakchiwalis ika techtapupulwia melka titateyekchijtiwit ikman. 26 Yaja ipanpa ne itasejselilis ne Teut. Kiane, ashan kilwitia ne itamelakchiwalis, pal ma yek wan pal tinakan ka yek ká ne kiyulmati Yeshu.

27 Yajika, kan nemi ne muweymatilis? Te kanaj! Uni ipanpa se tajtuli? Ken uni tajtuli? Se tajtuli ne techilwia tay tinemit pal tikchiwat? Inte. Se tajtuli ne techilwia ma titayulmatikan. 28 Tinat tel ka muilwitia ka yek se ipanpa ne itayulmatilis, inte ipanpa tay kichiwa tay ina ne tajtuli. 29 Yaja ne Teut ipal ne Yudayujmet isel? Anka yaja inte nusan ipal ne tejtechan? Kiane, nusan ipal ne tejtechan; 30 su sema sechin ne Teut, wan ipal ne Teut yek ne tayawaltekilis ipanpa tayulmatilis, wan kenhaya yek ne tzuntepul ika tayulmati. 31 Kwakuni, tikpuluat ne tajtuli iwan ne tayulmatilis? Intesu! Tiketzat ne tajtuli!

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes