Roma 12

Ne Bibliaj Tik Nawat

Ken nemi pal timuwikat

12 Yajika, nukniwan, ipanpa ne iekneli ne Teut nimetzintajtani ma shikishpanukan mujmuweyka ken se anmutetakulis yultuk ipal Teut ma ajwiak ipal ne Teut, ken yek ma anmutekitilis, ² wan maka shimuchiwakan kenha ken ini taltikpak sute shimuweykapatakan wan shimuyulyankwilikan, pal antachiat ken ne itaelewilis ne Teut: ne yek, ne tay ipal ajwiak, ne ken muneki.

³ Naja nimetzinhilwia ipanpa ne teutasujtalis ne nikwijtuk, ma inte aka mumati mas wey que yaja muneki mumati, sema ma kipia itzuntekun yek, sejse ken ne Teut kimakak ne tayulmatilis ipal. ⁴ Tikmatit ka tik tuweyka tikpiat miak takutun, wan ne itejtekiw ne tajtakutun te kenhat. ⁵ Nusan tel, melka timijmiak, muchi tejemet ken se itech ne Mawaltijtuk, wan sejse tejemet ken se takutun. ⁶ Sejse tejemet tikpiat ne tutetakulisyu tekenha ne techmakak ne teutasujtalis, wan ijkiuni ne tutekiw: asu teutaketzalis, ma taketza ipal ne Teut ken kiajkawa ne itayulmatilis; ⁷ wan asu tekitilis, ma tekiti yek; wan asu tamachtilis, ma tamachti; ⁸ wan asu mutajtawelilis, ma mutajtaweli. Ne ká tamaka, ma tamaka tay weli; ne ká tatuktia, ma kita ken; ne ká tapalewia, iwan pakilis.

⁹ Ne tutetasujtalis, ma tejkia; tikijiakan ne tay teyek, timusalukan itech ne yek. ¹⁰ Shiiknitasujtakan sejse wan sejse hasta kita ne se wan ne seuk ká ne achtu pal kitasujta ne iiknew. ¹¹ Tik anmutekiw maka shitatziwikan; ma kwakwalaka anmuyulu; wan shitekitikan ipal ne Teut. ¹² Shipajpakikan iwan tejchialis; kwak uij, shikselikan; shimutalikan tajtanit ne Teut. ¹³ Kwak munekit sejse ipal Teut, shikpalewikan; shimuwikakan yek iwan ne ejkuni. ¹⁴ Su aka metzintalultia, shikteuchiwakan, maka shikchiwakan maldictar. ¹⁵ Iwan ne pajpakit, shipajpakikan; iwan ne chukat, shichukakan. ¹⁶ Shisennemikan yek ijtik anmejemet. Ma te metzinhajwiak tay wejkapan, mas yek ne kajkanawak. Maka shimumatikan ka ankimatit muchi.

¹⁷ Maka shikwepilikan aka ne teyek iwan ne teyek. Shikitakan ken ankichiwaskiat tay yek tik itachialis muchi. ¹⁸ Su weli, shikchiwakan tay anmupal pal ansennejmachnemit iwan muchi. ¹⁹ Maka shimutzunkwikan anmusel, nuyejyektasujtatuk, shikajkawilikan ne ikwalan ne Teut, ika muijkwiluj:

²⁰ Mas yek, su mayana ne metzishijia, shiktakwalti; su amiki, shikmaka pal ati; ika su tikchiwa ijkiuni, tiaw tiktepewilia tejtekunal ijpak itzuntekun. ²¹ Maka shikeluni ipanpa ne teyek, shikeluna ne teyek iwan ne yek.