Psalmi 150

Biblia Sacra Vulgata

150 Alleluja. Laudate Dominum in sanctis ejus; laudate eum in firmamento virtutis ejus.

² Laudate eum in virtutibus ejus; laudate eum secundum multitudinem magnitudinis ejus.

³ Laudate eum in sono tubae; laudate eum in psalterio et cithara.

⁴ Laudate eum in tympano et choro; laudate eum in chordis et organo.

⁵ Laudate eum in cymbalis benesonantibus; laudate eum in cymbalis jubilationis.

⁶ Omnis spiritus laudet Dominum! Alleluja.