Psalme 49

Reimer 2001

Dee 49 Psalm

To dän Haupt Musikaunt, en Psalm fa dee Korah Säns.

¹ Horjcht no dit, jie gaunse Welt; horjcht aul jie dee enne Welt wone.

² Beides Mensche Saens un Mensche Kjinje, rikj un oam toop:

³ Mien Mul saul Weisheit räde, un dee Jedankje enn mien Hoat sele Festentnis jäwe.

⁴ Ekj woa mien Ua dol beaje to en Jlikjnes; ekj woa mien diestret Räde op moake opp ne Haop.

⁵ Wuaromm sull ekj mie enn dee Doag ferjchte wan Beeset kjemt, wan daut Gottlooset kjemt fonn dän dee mie ommrinje?

⁶ Soone dee enn äa Rikjdom fetruehe, un enn äa Hab un Goot, doone sikj puche.

⁷ En Maun kaun sien Brooda nijch rade, oda Leesjelt to Gott jäwe fa am –

⁸ dan dee Radunk fa äare Seel es kjestlijch, un daut deit fa emma oppheare –

⁹ dan hee woat doch fa emma läwe; hee woat niemols Fewäsunk seene.

¹⁰ Dan dee seeha Weise stoawe, dee Noa un dee soo aus en Tia sent kome toop omm, un lote äa Rikjdom to aundre.

¹¹ Äare ennalijche Jedanke sent daut äare Hiesa emma bliewe woare, un äare Woninj to aule Jeschaljchte; see nane äare Lenda no äare eajne Nomes.

¹² Oba dee Mensch saul nijch enn Ea bliewe: hee es soo aus dee Tiare, dee sele ommkome.

¹³ Dit es dee Noarische äa Wajch, un doch woare soone en Fejneaje ha dee an nofolje.

¹⁴ Dee woare bestemmt to dän Doot, dee Doot woat äwa an rejeare; un dee Opprajchte woare äwa an aum Morje rejeare; äa Form es fa fefule, daut Grauf es sien Heim.

¹⁵ Oba Gott woat miene Seel fonn daut Grauf rade, dan Hee woat mie näme. Selah.

¹⁶ Ha nijch Angst wan doa wäa Rikj woat, wan dee Harlijchkjeit fonn sien Hus toonemmt;

¹⁷ Dan wan hee stoaft, woat hee nuscht met näme, siene Harlijchkjeit woat nijch met am met gone.

¹⁸ Dan wäarent hee läft, deit hee siene Seel säajne – jo, Mensche doone die preise wan du goot deist fa die selfst-

¹⁹ Hee woat no dee Jeschlajchte fonn siene Fodasch gone; dee woare niemols Lijcht seene.

²⁰ En Mensch dee huach enn Ea es, oba nijch Festentnis haft, es soo aus dee Tiare, dee woare feschwinje.