Salmo 119:97-112

Ang Pulong Sa Dios

⁹⁷ Gihigugma ko gayod ang imong kasugoan!
Gipamalandongan ko gayod kini kanunay.
⁹⁸ Ug tungod kay ania kanako kanunay ang imong mga sugo, nahimo akong mas maalam kaysa akong mga kaaway.
⁹⁹ Mas daghan pa ang akong nahibaloan kaysa akong mga magtutudlo,
kay ang imong mga pagtulon-an mao ang akong gipamalandongan.
¹⁰⁰ Mas labaw ang akong panabot kaysa mga tigulang, kay gituman ko ang imong mga tulumanon.
¹⁰¹ Gilikayan ko ang tanang daotang buhat aron matuman ko ang imong pulong.
¹⁰² Wala ako molapas sa imong mga sugo,
kay ikaw man ang nagtudlo niini kanako.
¹⁰³ Pagkatam-is sa imong mga saad, mas tam-is pa kini kaysa dugos.
¹⁰⁴ Nakaangkon ako ug panabot gikan sa imong mga tulumanon,
busa gikapungtan ko ang tanang daotang buhat.

¹⁰⁵ Ang imong pulong sama sa suga nga nagahatag ug kahayag sa akong agianan.
¹⁰⁶ Tumanon ko gayod ang akong gipanumpaan nga motuman sa imong matarong nga mga sugo.
¹⁰⁷ Labihan gayod ang akong pag-antos;
busa lugwayi ang akong kinabuhi, Ginoo, sumala sa imong saad.
¹⁰⁸ Dawata, Ginoo, ang akong kinabubut-ong pagdayeg kanimo,
ug tudloi ako sa imong mga sugo.
¹⁰⁹ Bisan pa ug nagaungaw ako kanunay sa kamatayon, wala ko kalimti ang imong kasugoan.
¹¹⁰ Nagbutang ug lit-ag alang kanako ang mga tawong daotan,
apan wala ako mobiya sa imong mga tulumanon.
¹¹¹ Ang imong mga katudloanan mao ang akong bililhon nga panulondon sa walay kataposan,
kay mao kini ang akong kalipay.
¹¹² Nakahukom ako nga tumanon ko gayod ang imong mga tulumanon hangtod sa kataposan.