Salmo 119:153-176

Ang Pulong Sa Dios

¹⁵³ Tan-awa ang akong pag-antos ug luwasa ako,
kay wala ko kalimti ang imong balaod.
¹⁵⁴ Labani ako batok sa mga nagaakusar kanako ug luwasa ako;
lugwayi ang akong kinabuhi sumala sa imong saad.
¹⁵⁵ Dili maluwas ang mga daotan, kay wala sila magtinguha sa pagtuman sa imong mga tulumanon.
¹⁵⁶ Dako ang imong kalooy, Ginoo;
lugwayi ang akong kinabuhi sumala sa imong paghukom.^[a]
157 Daghang mga kaaway ang naglutos kanako,
apan wala gayod ako mobiya sa imong katudloanan.
¹⁵⁸ Nakita ko ang mga maluibon ug naglagot ako,
kay wala nila tumana ang imong pulong.
¹⁵⁹ Tan-awa, Ginoo, kon giunsa ko paghigugma ang imong mga tulumanon.
Lugwayi ang akong kinabuhi sumala sa imong gugma.
¹⁶⁰ Tinuod ang tanan mong mga pulong,
ug walay kataposan ang tanan mong matarong nga mga sugo.

¹⁶¹ Gilutos ako sa mga tigdumala bisan walay igong hinungdan,
apan ang akong kasingkasing nagatahod gayod sa imong mga pulong.
¹⁶² Nagakalipay ako tungod sa imong saad sama sa usa ka tawo nga nakakita ug daghang bahandi.
¹⁶³ Gikapungtan ko ug gikalagotan ang tanang bakak,
apan gihigugma ko ang imong kasugoan.
¹⁶⁴ Sa makadaghang higayon sulod sa usa ka adlaw, modayeg ako kanimo, tungod sa imong matarong nga mga sugo.
¹⁶⁵ Makaangkon ug malinawon ug mauswagon nga kahimtang ang mga nagahigugma sa imong kasugoan,
ug walay makalaglag kanila.
¹⁶⁶ Nagalaom ako nga imo akong luwason, Ginoo,
ug nagatuman ako sa imong mga sugo.
¹⁶⁷ Gihigugma ko pag-ayo ang imong katudloanan,
busa gituman ko gayod kini.
¹⁶⁸ Nahibaloan mo ang tanan kong gihimo,
busa gituman ko ang imong mga tulumanon ug mga katudloanan.

¹⁶⁹ Ginoo, hinaut nga pamation mo ang akong pagpakitabang kanimo.
Hatagi akog panabot sumala sa imong saad.
¹⁷⁰ Hinaut pa nga pamation mo ang akong pag-ampo.
Luwasa ako sumala sa imong saad.
¹⁷¹ Magadayeg ako kanimo kanunay,
kay gitudloan mo ako sa imong mga tulumanon.
¹⁷² Magaawit ako mahitungod sa imong pulong,
kay matarong ang tanan mong mga sugo.
¹⁷³ Hinaut nga andam ikaw kanunay sa pagtabang kanako,
kay gipili ko ang pagtuman sa imong mga tulumanon.
¹⁷⁴ Nangandoy ako nga imong luwason, Ginoo.
Ang imong kasugoan nagahatag kanako ug kalipay.
¹⁷⁵ Lugwayi ang akong kinabuhi aron madayeg ko ikaw,
ug hinaut nga makatabang kanako ang imong mga lagda.
¹⁷⁶ Nahisalaag ako sama sa nawala nga karnero,
busa pangitaa ako nga imong alagad
kay wala ko kalimti ang imong mga sugo.