A A A A A
Bible Book List

Pilipoy 4Ne Bibliaj Tik Nawat (NBTN)

Kiane, nukniwan ká nikneki wan niktasujta, nupakilis wan nuyawal, shiyulchikawikan tik ne Tajtzin, yejyektasujtatuk.

Nimutajtawelia iwan Ewodia wan nimutajtawelia iwan Suntuke ma kimatikan kenha tik ne Tajtzin. Ijkiasan nimetztajtani nusan, nukunpalej yek, ma shikpalewi uni siwatket ká sentekitket nuwan wan nusan iwan Clemente, wan muchi nusejsentekitini. Muijkwilujtiwit ne intujtukay tik ne Amat Yultuk!

Shipajpakikan ipanpa ne Tajtzin senpa! Niaw nina senpa: shipajpakikan! Ma muchi kimatikan ne anmuyulyamanikayu. Ne Tajtzin tunawak. Ma te tatka metzinyulkakasu, sute tik muchi, pal ankineshtiliat ne Teut tay ankitajtaniliat, shiktajtanikan ne Teut wan shimutajtawelikan iwan, wan shikilwikan panpadiush. Wan ne inejmachnemilis ne Teut, ne weli mas que muchi tutamatilis, ma tajpia ne anmuyujyulu wan ne anmutajtamatilis itech ne Mawaltijtuk Yeshu.

Pal tami, nukniwan, muchi tay tejkia, tay tinat ka nemi yek, tay yulmelawak, tay yek ipal Teut, tay galan, tay mukaki yek, su se muita yek wan su se muilwia yek, shikishkejketzakan yajane. Tay ne anmumachtijtiwit wan ankikwijtiwit yek wan antakaktiwit wan ankitztiwit nutech, shikchiwakan yajane wan ne Teut ipal nejmachnemilis yawi nemi anmuwan.

10 Nipakik wey tik ne Tajtzin ika anmukwepketa nechelnamikit, melka senpa ankielnamikit wan te ankipiatuyat ken. 11 Te nina ika kichijki faltaj, ika naja nimumachtijtuk ken nipanuskia nujme ninemi. 12 Niweli nimutemultia wan niweli nisamawa, nikmati ken ninemiskia nujme wan tik muchi: weli nishwi wan nimayana, su nisamawa wan su nechchiwa faltaj. 13 Muchi niweli ika nechmaka nutajpal; 14 melka uni, yektzin ankichijket ika annechkunpachijket tik nutapitzinilisyu.

15 Anmejemet, takamet wan siwatket ipal Pilipoy, ankimatit ka kwak pejki ne yeknawatilis, kwak nikiski Macedonia, nian se sennemit nechpalewij iwan tumin sute anmejemetsan anmusel. 16 Nusan kwak ninemik tik Tesalonika wan nimunekik, annechtuktilijket seujti wan uksenpa. 17 Inte niktemua ne tetakulis; tay ne niktemua, yaja ma tepewi ne anmutakil ka anmumaku. 18 Nikpiaya muchi, wan nitepewi. Nishwituk: nikwijtuk itech Epaproditos anmupuputuka ajwiak, se yek tetakulis ken ajwiak ipal ne Teut. 19 Ne Teut yawi metzintepewilia muchi tay anmunekit, yawi metzinmaka ne itzitzinakalis wey ijtik ne Mawaltijtuk Yeshu. 20 Ma inakan ka wey tuteku ne Teut senpa wan senpa, amen.

21 Shiktajpalukan muchi ne kiyulmatit ne Mawaltijtuk Yeshu. Ne tukniwan nuwan metzintajpaluat. 22 Metzintajpaluat muchi ne tayulmatit, wan mas que muchi, ne tayulmatit tik ne ikal ne Taltikpaktuktiani. 23 Ma nemi ne itetasujtalis ne tajtzin Yeshu Mawaltijtuk iwan ne anmuijiu.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes