A A A A A
Bible Book List

Pilipoy 1Ne Bibliaj Tik Nawat (NBTN)

Tejemet, Pawlo wan Timoteo, itejtekitini ne Mawaltijtuk Yeshu, tiktuktiat ini tajkwilul itech muchi ne tukniwan ne kiyulmatit ne Mawaltijtuk Yeshu ká nemit tik Pilipoy, iwan ne tapachiwianimet wan ne tekitinimet. Ma metzinmaka ne Teut ká ne tuteku, wan ne tajtzin Yeshu Mawaltijtuk, tetasujtalis wan nejmachnemilis.

Senpa nikilwia ne Teut padiush kwak nimetzinhelnamiki, tik muchi ne nuteujteutajtanilis anmupanpa, wan niktajtani ne Teut iwan pakilis, ipanpa ne anmumusentepewalis ipal ne yeknawatilis kwak tipejket wan senpa hasta ne tunal pal ashan. Nikmati ini, ka ne ká kitzintij se yek itekiw anmuwan yawi kitamia yek hasta ne tunal ipal ne Mawaltijtuk Yeshu.

Yek ma nimumati ijkiuni anmupanpa, ika nimetzinpia tik nuyulu muchi anmejemet, kwak ninemi ilpituk wan kwak nina wan nikilwitia ka tejkia ne yeknawatilis, ken nukunpalejwan tik teutasujtalis; ika ne Teut kimati ken nimetzinneki muchi anmejemet iwan ne iyulkukulis ne Mawaltijtuk Yeshu, wan niktajtani ne Teut ma tepewi sujsul sujsul ne anmutetasujtalis tik taishmatilis wan tachialis, 10 pal ankitat yek tay ne wey ipatiw, pal ma shimuchiwakan yujyulchipawak wan yejyek ipal ne tunal ipal ne Mawaltijtuk, 11 wan tejtentuk iwan itakil tamelakchiwalis ipanpa Yeshu Mawaltijtuk pal inat ken wey wan yek ne Teut.

12 Niknekiskia ma shikmatikan, nukniwan, ka tay ne muchijki nuwan mas yek kipalewijtuk ne yeknawatilis, 13 ken ne nuijilpika ipanpa ne Mawaltijtuk muneshtijtiwit tik muchi ne wey kal wan nujme, 14 wan muchi tukniwan kiyulmatit mas ne Tajtzin ipanpa ne nuijilpika wan sujsul mas yawit tanutzat ne palabraj wan te yawit majmawit.

15 Nusan tejkia ka sejse tanajnawatiat ipal ne Mawaltijtuk ipanpa envidiaj wan tasumalis, wan sejseuk ika yejemet kitat yek. 16 Tejkia ka ne sekit kichiwat ika kimatit ka ninemi pal ninankilia ipanpa ne yeknawatilis, 17 wan ne sekit tanawatiat ipanpa ne Mawaltijtuk pal muishtemuat tay kinekit, wan te iwan yulchipakayu, ika inat ka kiane yawit kipitziniat chiupiuk ne nuijilpika. 18 Melka ijkiuni, tay kineki ina? Anka kimatit ka yawit muitat yek, anka tik yekkaya, pero tanawatiat ipanpa ne Mawaltijtuk wan yajika nipaki wan nipakis nusan, 19 ika niaw nimupalewia ipanpa muchi uni, iwan ne anmuteutajtanilis wan iwan tay nechpalewia ne iijiu Yeshu Mawaltijtuk, 20 ken nitejchia wan nikmati ka te niaw nishpinawa ipanpa tatka, sute ashan ken senpa, iishpan muchi, inasket ka wey ne Mawaltijtuk su nuweyka yultuk wan nusan su miki, 21 ika su niyultuk, kineki ina ne Mawaltijtuk, wan su nimiki, nupal yek! 22 Su yultuk nuweyka, uni kineki ina itakil nutekiw, wan tay nikishpejpenas inte nikmati: 23 ne ujume nechmalachuat, ika melka niknekiskia niaw ninemi iwan ne Mawaltijtuk, ika sujsul mas yek, 24 anmejemet munekit mas ma ninaka yultuk; 25 wan yajika, nikmati ka niaw ninaka wan nimukawas anmupal, pal nimetzinpalewia wan ipal ne pakilis ipal ne tayulmatilis, 26 pal ma shikweymatikan mas ne Mawaltijtuk Yeshu nupanpa kwak niajsi anmutech uksenpa.

27 Sema shinejnemikan iwan ne iyeknawatilis ne Mawaltijtuk ken muneki, pal kiane naja su niajsi wan nimetzinhita wan su te niajsi ma nitakaki ka annakat tik sanse anmuijiu wan sanse anmuyulu musenhejekuat ipanpa ne tayulmatilis ipal ne yeknawatilis, 28 wan ma te shimuishmutikan ipanpa tatka tay kichiwat ká ne metzintejtenewat. Uni kinhilwitia ka pulijtiwit, wan anmejemet mumakishtijtiwit, wan ne Teut kichijtuk muchi. 29 Ika tay ne metzintakulijtiwit ipanpa ne Mawaltijtuk, te semaya ma shikyulmatikan, nusan ma shitaekukan ka imaku, 30 tik sanse tasumalis, kenha ken annechitztiwit nutech wan ashan antakakit nutech.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes