Pilemon

Ne Bibliaj Tik Nawat

¹ Naja, Pawlo, ilpituk ipal ne Mawaltijtuk Yeshu, wan ne tuiknew Timoteo, tiktuktiat ini tajkwilul itech Pilemon tutepalewiani yektasujtatuk, ² wan tueltiw Apia, wan ne tukunpalej tasumani Arkipos, wan ne sennemit ijtik mukal. ³ Ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.

⁴ Nikmaka padiush wan senpa nimetzelnamiki kwak niteutajtani. ⁵ Nitakaki ken taja tiktasujta wan tikyulmati ne tajtzin Yeshu wan muchi ne tayulmatit, ⁶ wan ken ne tasentepewalis ipal ne mutayulmatilis tekiti iwan taishmatilis ipal muchi tay yek, tay ne nemi ijtik tejemet ipanpa ne Mawaltijtuk. ⁷ Ika sujsul nipakik wan nimupalewij ipanpa ne mutetasujtalis, ika taja tikchijtuk ka tea kikukua iyulu ne tayulmatit, nuiknew!

⁸ Ipanpa uni, melka niweliskia nimetztuktia melaknaj ipanpa ne Mawaltijtuk ne tay muneki, ⁹ mas yek nimutajtawelia ipanpa tetasujtalis naja, Pawlo, ká chuleta, wan ashan nusan ilpituk ipal ne Mawaltijtuk Yeshu.

¹⁰ Nimutajtawelia muwan pal tikpalewia ne nukunew ká nikpishtuk tik ijilpika: Onesimos. ¹¹ Melka achtu yaja te metzpalewij, ashan yawi techpalewia taja wan naja. ¹² Niktuktijtuk mutech, yaja ká sujsul nikneki.

¹³ Melka naja niknektuskia nikilwia ma naka nutech pal nechpalewia ka mupatka nikan tik ne ijilpika ipal ne yeknawatilis, ¹⁴ te niknekik nikchiwa tatka su te tinatuya ka yek, pal ma te shinechchiwili se tay yek ipanpa munekilis sute ipanpa taelewilis. ¹⁵ Ika ká kimati su yaja metzajkaw achi tunal sema pal kiane ma shikpiaya pal senpa, ¹⁶ tea ken tekitini, sute mas que se tekitini, ken se muikaw yektasujtatuk, ika su nupal ijkiuni, mupal keski mas, tik iweyka wan nusan tik ne Tajtzin!

¹⁷ Yajika, su tinechpia ken mukunpa, yaja shikwi ken naja tinechkwiskia. ¹⁸ Su metzchiwilijtuk se tay te yek o metzwikilia, shikpua ken nujaranaj. ¹⁹ Naja, Pawlo, nitajkwiluj iwan ne numey. Naja nimetzkwepilis, wan te niaw nimetzilwia ka taja nusan tinechwikilia. ²⁰ Ijkiasan, nuiknew! Ma nimetztajtanili ini tik itukay ne Tajtzin; shiksewi nuyulu ipanpa ne Mawaltijtuk.

²¹ Nikmatiaya ka tiaw tinechtakamati, yajika nitajkwilujtuk mupal wan nina ka tiaw tikchiwa tay nimetzilwia.

²² Wan shinechajshitili se kan niweli ninaka, ika nitejchia ka su niktajtani ne Teut yawit nechtemakat anmuwan.

²³ Metztajpalua Epapras ká iwan ninentuk ilpituk ipanpa ne Mawaltijtuk Yeshu, ²⁴ Marcus, Aristarkos, Demas, Lukas, nutejtepalewiani.

²⁵ Ma nemi ne teutasujtalis ipal Yeshu Mawaltijtuk iwan anmuijiu.