Bible Book List

Numba 2 Fo Da Corint Peopo 3 Hawai‘i Pidgin (HWP)

Us, Da Helpa Guys Fo Godʼs New Deal

If you guys tink we starting fo talk big bout ourself some moa, we not! If you guys tink we need lettas to you guys o from you guys, fo tell dat we good guys, jalike da odda guys need, we no need um! We get one letta awready, an dass you guys, you know. Da stuff we know bout you guys, stay inside our heart awready. Everybody know you guys, jalike dey reading one letta. Stay clear dat you guys, you stay jalike one letta dat Christ wen write, an dat he wen give to us guys fo bring ova hea. Christ neva use ink fo write um, he wen use da Spesho Spirit from da God dat stay alive fo real kine. Christ neva write um on top one flat stone da way da Boss Up Dea wen do um fo Moses -- da ting Christ wen write on top, dass someting dass alive, I mean jalike he write um inside da peopoʼs hearts so dey know um.

We know we can trus God dat all dis stuff stay true, cuz Christ wen show us. Our own self, we no can say dat we get da power fo do anyting. Da ony power us guys get, come from God. God da One wen make us da kine workas dat can tell peopo bout Godʼs New Deal. Dat New Deal not bout sticking wit some rules, but sticking wit Godʼs Spirit. If you ony stick wit da Rules, jalike you mahke inside, you no get da real kine life dat stay to da max foeva. But if you stick wit Godʼs Spirit, you live fo real kine.

Da time God wen carve da Rules on top da flat stone, was awesome, you know. (But no matta you do wat dose Rules say, still yet you goin cut yoaself off from God.) Den, afta Moses wen get da Rules, his face wen shine so plenny, was so awesome, dat da Israel peopo no can stay look at um. But den da shine wen go way. So den, wat Godʼs Spirit do inside our hearts stay plenny mo awesome den dat! You know, cuz a da Rules we mahke, but still yet da Rules stay awesome. Godʼs Spirit help us get um right wit God, an dat even mo awesome. 10 Da Rules dat everybody wen tink stay awesome, jalike dey not awesome now, cuz get someting dat stay even mo awesome. 11 You know, da Rule kine stuff stay awesome. Dey awesome jalike Moses face an den da shine wen go way. Still yet, dey stay awesome. But dose tings dat stay foeva, dat kine stuff stay mo awesome still yet.

12 All us guys know fo shua dat Godʼs New Deal goin stay foeva, dass why we no mo shame fo talk strait out. 13 We no need ack jalike Moses. He wen cover up his face so da Israel peopo no can see da shine go way. 14 Da Israel peopo, God wen make um hard head so dey no can tink good. Even right now wen dey read inside da Bible bout da Deal from befo time dat God wen make, jalike dey get cover ova dea head, cuz dey no like listen, an no can undastan. No mo nobody can make um listen an undastan, ony Christ can. 15 Even now still yet, weneva da Jewish peopo read wat Moses wen write, dey listen, but dey no undastan, cuz dey no listen inside dea hearts, jalike dey get cover ova dea hearts. 16 But weneva somebody start fo trus da Boss, Christ help um undastan inside dea hearts. Jalike da Bible wen tell bout Moses, “He take away da ting dat cover his face.” 17 Inside da Bible, wen Moses wen talk bout “Da Boss,” he mean Godʼs Spirit, same ting. Wen we get da Spirit from da Boss Up Dea, we can talk to God any time we like. 18 Az how he change us fo come awesome jalike him, mo an moa. An our faces no stay cover up, an now we can stay tinking plenny bout how awesome da Boss stay. Da Spirit from da Boss Up Dea, dass how he help us.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved


1 of 1

You'll get this book and many others when you join Bible Gateway Plus. Learn more

Viewing of
Cross references