A A A A A
Bible Book List

Numba 1 From Peter 3Hawai‘i Pidgin (HWP)

Wifes, Listen To Yoa Husban

Same ting, you wifes listen to yoa husban. So dat, if get some husbans dat no like do wat God say, dey goin go trus him, not cuz a wat you say, but cuz dey see how you make. Dey goin see how you do everyting wit plenny respeck, an stay ony good. Da good looks you get not suppose to come from wat you look like outside, jalike da fancy kine hairdo, da gold kine jewelry, o da fancy kine clotheses. Wat mo importan, suppose to come from da inside, jalike doing everyting nice kine, an no make plenny noise. Dass da kine stuff no going pau. God say, “Dat kine worth plenny to me.” Dass da way da wahines dat wen stay spesho fo God an trus him long time ago wen make. Dey wen listen to dea own husban. Jalike Sarah, she wen do everyting Abraham say, an say dat he stay in charge. You wahines jalike her, cuz you doing da good kine stuff, an you no need worry bout notting.

Husbans, Listen To Yoa Wife

Same ting you husban guys, cuz you stay wit yoa wife, den tink wat stay good fo her, an do um. Show plenny respeck fo her in everyting you doing, cuz she not strong jalike you guys. Her an you togedda goin get da good ting God like give you guys: you an yoa wife goin live da good kine life. If you make lidat, den you can pray wit yoa wife, an God goin listen.

You Guys Goin Suffa Cuz You Do Da Right Kine Tings

So den, all you guys, dis da last ting I goin tell you. Tink da same way. Get da same kine heart. Get plenny love an aloha fo da bruddas an da sistas. Get pity fo each odda. No get big head fo notting. If somebody do da bad kine tings to you, no do da bad kine tings back. If somebody talk any kine to you, no talk any kine back. But aks God fo do good kine stuff fo da guy. Dass why God wen tell you guys fo come be his guys, so he can do good kine stuff fo you guys. 10 Cuz da Bible say,

“Whoeva like live life good,
An be jalike dat every day,
He gotta pau say da bad kine tings,
An no bulai an scam nobody,
11 He betta not do da bad kine stuff no moa,
Ony do da right kine stuff.
He gotta like make friends wit everybody,
An learn how fo make good wit dem.
12 Cuz da Boss Up Dea get aloha fo da peopo
Dat do tings jalike dey suppose to,
An he listen good wen dey pray to him,
But da Boss stay agains
da peopo dat do da bad kine stuff.”

13 Eh, who goin touch you guys if you guys like do good kine stuff everytime? 14 But even if you suffa plenny fo da right ting, you can feel good inside plenny. No scared da same tings dat scare dem, an no come all mix up. 15 Get choke respeck fo Christ inside yoa hearts, cuz he stay spesho fo God. Everytime stay ready fo tell anybody dat stay aksing you how come you know everyting goin come out good fo you. 16 But tell um nice, an show respeck fo dem, so dat you know you doing da right ting. Goin get guys dat talk agains you guys, no matta you guys do good kine stuff cuz you stay tight wit Christ. Dem guys goin come shame, cuz dey wen talk any kine bout you guys. 17 If dass wat God like, mo betta you guys suffa fo do da right ting den fo do da bad kine ting.

18 You know, Christ wen awready mahke one time,
    Cuz everybody stay doing da bad kine stuff.
He everytime do da right ting,
    But den he wen mahke fo all da peopo dat stay doing wrong kine tings.
He wen mahke so dat you guys can know God.

Christ was one guy jalike us,
    But peopo wen kill him,
    An Godʼs Spirit wen make him come alive again. 19 Cuz a Godʼs Spirit, Christ wen go teach da spirits dat stay inside one place jalike one jail. 20 Dey da peopo dat neva like listen to God long time ago. Dat time, Noah stay making da big boat. God stay waiting fo da peopo fo do wat he say, but dey neva like. Dass why ony da eight peopo inside Noahʼs boat wen come outa da big floods okay. 21 Dat floods one picha, jalike wen you guys get baptize. Dat show dat God stay taking you guys outa da bad kine stuff you doing, cuz Jesus Christ wen come back alive again. Wen dey wen baptize you, dat neva mean you jus bafe fo clean yoa body. Dat mean you aksing God fo clean yoa heart, so you know you doing da right ting. 22 Jesus wen go back inside da sky, an he stay ova dea in da mos importan place, by Godʼs right side. Get all da angel guys, da leada guys, an da guys wit power, an dey all gotta do wat he say.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes