Numba 1 Fo Da Corint Peopo 7 Hawai‘i Pidgin (HWP)
Da Husban An Da Wife
7 Now I like talk bout da stuff you guys wen aks me inside yoa letta bout da guys an da wahines. Dass good idea, fo one guy no touch one wahine. 2 But get peopo dat like fool aroun, you know. Dass why mo betta every guy get his own wife, an every wahine get her own husban. 3 Da husban gotta give his wife wat she need, an same ting fo da wife. 4 Da wife no ony own her body, but da husban too. Same ting, da husban no ony own his body, but da wife too. 5 No hold back from each odda. You can fo short time, but ony if da husban an da wife tell each odda dey goin hold back fo get time fo pray. An den come back togedda, so da Devil no can make you guys presha make you fool aroun behind da oddaʼs back. But if you no come back togedda fast, you no goin be strong nuff fo say “No!” to da Devil. 6 I no telling you guys you gotta hold back, but you can if you like. 7 I tink mo betta, if peopo no marry, jalike me. But every guy get one spesho power dat God wen give um. He give some peopo da power fo handle if dey marry, an odda peopo da power fo handle if dey no marry.
8 I like tell da peopo dat not married an da widows: Mo betta you no marry, jalike me awready. 9 But, if you no can handle, den mo betta get married. Mo betta fo marry den come all hot.
10 I like tell da married peopo dis (but dis come from da Boss Up Dea, not me): Da wife not suppose to leave her husban. 11 O if she leave um, she not suppose to marry again, o she gotta go back wit her husban an make tings good. An da husban not suppose to make his wife go way too.
12 An fo da odda guys, I like tell um dis (dass me talking, not da Boss): If one Christian brudda get one wife dat no trus God, he not suppose to throw her out if she like stay wit him. 13 Same ting, if one wahine get one husban dat no trus God, she not suppose to leave him if he like her stay wit him. 14 Da husban dat no trus God stay spesho fo God still yet, cuz he stay tight wit da wife dat trus God. An da wife dat no trus God stay spesho fo God still yet, cuz she stay tight wit da husban dat trus God. If no was lidat, den dea kids no stay spesho, but cuz one a da parents trus God, da kids stay spesho fo God too. 15 But da husban o da wife dat no trus God, if dey like leave, den let um. Da one dat trus God no stay stuck wit da marriage if da one dat no trus God like go. Cuz God wen tell you guys fo come be his guys, so yoa hearts can rest inside. 16 But if you one Christian wahine, you donno if you no can help yoa husban get outa da bad kine stuff. An you brah, if you one Christian guy, you donno if you no can help yoa wife get outa da bad kine stuff.
Stick Wit Da Way Da Boss Wen Give You Fo Live
17 But stick wit da way Jesus da Boss wen give you fo live, cuz God wen tell you fo come be his guys. Dis da rule I teach all da church peopo every place. 18 If you get da cut skin mark on top yoa body fo show you one Jew, an den God tell you fo come be his guy, no need change da mark. But if you no mo da mark, an God wen tell you fo come be his guy, no need cut skin. 19 If you wen cut skin, no matta. If you neva cut skin, no matta, same ting. Main ting, us guys do wat God tell us fo do.
20 Wen God wen tell you fo come wit him an be his guy, he neva say fo change everyting. Ony stay da way you was. 21 Jalike, if you was one slave wen God wen tell you fo come, no let dat bodda you. If you can get out, den do um. If not, dass okay. 22 If one guy stay one slave, an da Boss tell um fo come be his guy, he stay tight wit da Boss. No matta da guy one slave still yet, now he work fo da Boss Up Dea. An if da guy no was one slave wen da Boss wen tell him fo come, now he one slave fo Christ.
23 Christ wen pay high price fo you guys, you know. So no be one slave fo odda peopo. 24 Eh, bruddas an sistas! Wen God wen tell you guys fo come be his guys, no go make all kine changes. Ony stick wit da way you was. Do um fo God.
Da Peopo Dat Not Married
25 You guys wen aks me bout da peopo dat neva sleep wit nobody. Da Boss neva tell me how dey gotta make, but dis wat I tink. You can trus wat I say, cuz God, he good to me an give me chance. 26 You know, get plenny trouble an presha nowdays. Dass why I tink, mo betta stay da way you was. 27 You get one wife? No throw her out. You no mo one wife? No go looking. 28 But if you marry, you no stay doing notting wrong. If one wahine dat neva marry go marry, she no stay doing notting wrong. But da peopo dat get married goin get problem inside dis world, an I ony trying fo help you guys, so you no suffa.
29 Eh bruddas an sistas! I like say dis: No mo time awready, if you get one wife o you no moa. Cuz da way da world stay now, goin all pau. 30 Same ting if you crying o you not crying, if you stay good inside o you no stay good inside, if you can buy stuff o you no mo notting, 31 o if you use da stuff from dis world, o if you let um go, no big ting. Cuz da way da world stay now, goin all pau.
32 I like you guys no worry. Da guy dat not married, he get mo time fo tink bout da Boss, az why he can do stuff fo make da Boss stay good inside. 33 Da married guy, he gotta tink bout da stuff inside da world too. Az why he no can tink good, cuz he like do good fo his wife, an same time tink bout da Boss. 34 He get two diffren kine tings fo tink bout. Same ting, da wahine dat no mo husban an da wahine dat not married, dey get mo time fo tink bout da Boss, how dey can stay all out fo da Boss, dea spirit, dea body, everyting. But da married wahine gotta tink bout da stuff inside da world too. Az why she no can tink good, cuz she like do good fo her husban, an same time tink bout da Boss. 35 I telling you guys dis stuff, cuz good fo you guys. I no like jam up you guys. I like you guys do da right ting, an know wat da Boss like you fo do an be ready fo do um, an no worry bout odda kine stuffs.
36 If get one guy dat stay ready fo marry one wahine, an he figga he making her wait long time, if she old nuff fo marry awready, go ahead. Marry her, if dass wat you like. Dass okay, you no doing notting wrong. 37 But if get one guy who know wat he like, an he can handle, an wait, an he stay make up his mind fo no get married, dass okay too. 38 Good ting fo da guy marry her, but mo betta, da guy no get married.
39 So den, da wife gotta stay wit da husban till he mahke. Afta he mahke, she can marry if she like, but ony if da odda guy stay tight wit da Boss. 40 I figga, I get Godʼs Spirit in charge a me, an dass wat he like me fo say: Mo betta fo her if she no marry.