Nnwom 78

Nkwa Asem

Onyankopɔn ne ne nkurɔfo

78 Me nkurɔfo, muntie me nkyerɛkyerɛ na monyɛ aso mma asɛm a meka no. ² Mede abebu rebɛkyerɛ mo anwonwade a esii tete no mu; ³ nneɛma a yɛate na yɛahu; nneɛma a yɛn agyanom kaa ho asɛm kyerɛɛ yɛn. ⁴ Yɛremfa nkame yɛn mma; yɛbɛka Awurade tumideyɛ ne anwonwade a wayɛ akyerɛ nkyirimma. ⁵ Ɔmaa Israelfo mmara na ɔde ahyɛde nso maa Yakob asefo. Ɔka kyerɛɛ yɛn agyanom se wɔnkyerɛkyerɛ wɔn mma ne mmara no, ⁶ sɛnea ɛbɛyɛ a nkyirimma besua na wɔn nso akyerɛkyerɛ wɔn mma. ⁷ Ɛba saa a, wɔn nso de wɔn ho bɛto Onyankopɔn so, na ɛremma wɔn werɛ mfi nea wayɛ, na daa wobedi ne mmara no so. ⁸ Wɔrenyɛ sɛ wɔn nenanom adɔnyɛfo ne asoɔdenfo a wɔn gyidi a na wɔwɔ wɔ Onyankopɔn mu no antim da, nanso wɔantena ase sɛ nokwafo amma no.

⁹ Efraimfo a wokitakita nnyan ne ne ntadua no guanee ɔko da no. ¹⁰ Wɔanni wɔne Onyankopɔn apam no so; wɔampɛ sɛ wodi ne mmara no so. ¹¹ Wɔn werɛ fii anwonwade a wohui sɛ wayɛ no. ¹² Bere a na wɔn nenanom rehwɛ Onyankopɔn no, na ɔno nso reyɛ anwonwade wɔ Soan a ɛwɔ Misraim no. ¹³ Ɔkyɛɛ ɛpo mu na ɔde wɔn faa mu. Ɔmaa nsu no gyinae sɛ afasuw. ¹⁴ Ɔnam omununkum mu dii wɔn anim awia ne anadwo, kanea gya mu. ¹⁵ Ɔpaee ɔbotan mu wɔ bepɔw so, na onyaa nsu fii mu de maa wɔn. ¹⁶ Ɔmaa asuwa bɛtɔɔ ɔbotan no mu maa nsu sen fii mu sɛ asuten. ¹⁷ Nanso wɔkɔɔ so yɛɛ bɔne tiaa Onyankopɔn na bepɔw no so, wɔsɔre tiaa ɔsorosoroni no. ¹⁸ Wɔboapa bisaa aduan a wɔpɛ de sɔɔ Onyankopɔn hwɛe. ¹⁹ Wɔkasa tiaa Onyankopɔn se, “Onyankopɔn betumi ama aduan wɔ sare so anaa? ²⁰ Ɛwom sɛ ɔbɔɔ ɔbotan mu maa nsu pii sen fii mu, na obetumi ama yɛn abodoo na wama ne nkurɔfo nam nso?” ²¹ Enti Onyankopɔn tee no, ne bo fuwii, na ɔde ogya kɔɔ ne nkurɔkfo so, na n’abufuw a ɛwɔ wɔn so no mu yɛɛ den ²² efisɛ, na wonni ne mu gyidi sɛ obetumi agye wɔn nkwa. ²³ Nanso ɔkasa kyerɛɛ soro; ɔhyɛ maa n’apon buei. ²⁴ Ɔtɔɔ mana ma wodii. ²⁵ Enti wodii abɔfo aduan, na Onyankopɔn maa wɔn nea ehia wɔn nyinaa.

²⁶ Bio, ɔmaa apuei mframa bɔe, na ne tumi mu, ɔhwanyanee anadwo mframa, ²⁷ na ɔmaa ne nkurɔfo nnomaa a wɔn dodow bɛyɛ sɛ mpoano anhwea. ²⁸ Wɔtetew guguu ntamadan no mu ne ho nyinaa. ²⁹ Enti nnipa we mee. Onyankopɔn maa wɔn nea wɔhwehwɛ. ³⁰ Nanso, wɔn ani ansɔ nea wɔhwehwɛ no nyinaa ho a na wogu so didi ³¹ bere a Onyankopɔn ani beree wɔn so na okum mmarima ahoɔdenfo a na wodi mu wɔ Israel no. ³² Eyinom nyinaa akyi, na bɔne ara na nnipa no reyɛ; n’anwonwade no nyinaa akyi, wɔamfa wɔn ho anto ne so. ³³ Enti otwaa wɔn nna so te sɛ ɔhome na wɔn nkwa yɛɛ sin prɛkopɛ.

³⁴ Bere biara a obekum wɔn mu bi no, nkae no dan ba ne nkyɛn; wɔbɛsesa abɔ no mpae dennen. ³⁵ Wɔkaee sɛ Onyankopɔn yɛ wɔn hwɛfo, na Otumfoɔ no bɛboa wɔn. ³⁶ Nanso na wɔn nsɛm no nyinaa yɛ atoro. Nsɛm a wɔka no mu biara nyɛ nokware. ³⁷ Na wonni no nokware; na wonni wɔne n’apam no nokware. ³⁸ Nanso na Onyankopɔn wɔ ahummɔbɔ ma ne nkurɔfo. Ɔde wɔn bɔne kyɛɛ wɔn na wansɛe wɔn. Mpɛn pii ɔkoraa nabufuw so na wanna n’abufuw adi. ³⁹ Ɔkaee sɛ wɔyɛ adasamma te sɛ mframa a ɛbɔ na etwam no.

⁴⁰ Mpɛn ahe na wɔansɔre antia no wɔ sare so hɔ, na mpɛn ahe na wɔamma ne werɛ anhow! ⁴¹ Wɔsɔɔ Onyankopɔn hwɛe adekyee ne adesae nam so de yaw brɛɛ Israel Nyankopɔn Kronkron no. ⁴² Wɔn werɛ fii ne tumi kɛse no ne da a ogyee wɔn fii wɔn atamfo nsam, ⁴³ wɔ Soan tawtaw so a ɛwɔ Misraim no. ⁴⁴ Ɔmaa nsu dan mogya a na Misraimfo nnya nsu nnom. ⁴⁵ Ɔmaa nwansena baa wɔn so bɛhaw wɔn na mpɔtorɔ nso bɛsɛee wɔn asase.

⁴⁶ Ɔmaa mmoadabi bedii wɔn mfuduan de sɛee wɔn mfuw. ⁴⁷ Ɔde asukɔtweaa bɛsɛee wɔn bobe na ɔde sukyerɛmma sɛee wɔn ankye nnua. ⁴⁸ Ɔde asukɔtweaa kum wɔn anantwi ɛnna ɔde anyinam kum wɔn nguan. ⁴⁹ Ɔnam n’abufuw a ano yɛ den a ɛbae te sɛ owu asomafo no maa ɔhaw kɛse baa wɔn so. ⁵⁰ Wamfa n’abufuw ansie, na wamfa wɔn nkwa nso ankyɛ wɔn. Mmom, ɔmaa ɔyaredɔm bekum wɔn. ⁵¹ Okum Misraimfo mmakan nyinaa.

⁵² Afei odii ne nkurɔfo anim te sɛ oguanhwɛfo de wɔn faa sare no so. ⁵³ Odii wɔn anim dwoodwoo, enti na wonsuro. Nanso ɛpo asorɔkye bɛbɔ faa wɔn atamfo so. ⁵⁴ Ɔde wɔn baa n’asase kronkron no ne mmepɔw a ɔko dii so no so. ⁵⁵ Ɔpamoo nnipa a na wɔte hɔ no de hɔ maa ne nkurɔfo. Ɔkyekyɛɛ wɔn nsase no mu de maa Israel mmusuakuw no de wɔn afi maa ne nkurɔfo no.

⁵⁶ Nanso wɔsrɔre tiaa Onyankopɔn tumfoɔ sɔɔ no hwɛe. Wɔanni ne mmara so. ⁵⁷ Na mmom, wɔsɔre tiaa no na wɔanni nokware sɛ wɔn agyanom, wɔn a wɔde wɔn ho to wɔn so a, ɛnyɛ ye te sɛ agyan a akyeakyea no. ⁵⁸ Wɔn abosonsom hyɛɛ no abufuw, na wɔn ahoni a na wɔsom no maa ne bo fuwii.

⁵⁹ Onyankopɔn hui no, ne bo fuwii enti ɔpoo ne nkurɔfo no koraa. ⁶⁰ Ogyaw ne ntamadan wɔ Silo, faako a na ɔte wɔ wɔn mu no. ⁶¹ Ɔmaa yɛn atamfo faa Apam Adaka a ɛyɛ ne tumi ne n’anuonyam agyiraehyɛde no. ⁶² Ne bo fuwii ɔno ara ne nkurɔfo enti ɔmaa wɔn ara wɔn atamfo kunkum wɔn. ⁶³ Wokum mmerante wɔ ɔsa mu, enti na mmabaa nnya kunu nware. ⁶⁴ Asɔfo wuwui basabasayɛ mu na wɔamma wɔn akunafo no kwan amma wɔansu. ⁶⁵ Akyiri yi, Awurade sɔree sɛnea ofi nna mu. Na ɔte sɛ ɔhoɔdenfo a nsa ahyɛ no den. ⁶⁶ Odii wɔn so nea edi kan ne nea etwa to hyɛɛ wɔn aniwu, pamoo wɔn. ⁶⁷ Nanso ɔpoo Yosef asefo. Efraim abusua nso, wamfa wɔn. ⁶⁸ Na mmom, oyii Yuda ne Sion Bepɔw a na ɔpɛ n’asɛm no. ⁶⁹ Ɛhɔ na osii ne fi te sɛ ne soro fi. Ɔyɛɛ no den te sɛ asase pɛ a etim hɔ daa. ⁷⁰ Oyii ne somfo Dawid a ɔfrɛɛ no fii nguan adidibea hɔ no; ⁷¹ ɔno na ɔhwɛɛ ne nguan so na ɔyɛɛ no Israel hene ne Onyankopɔn nkurɔfo so oguanhwɛfo. ⁷² Dawid de ne koma ne ne nyansa nyinaa hwɛɛ wɔn.