Nnwom 26

Nkwa Asem

Ɔtreneeni mpaebɔ

26 Bu me bem, O Awurade, efisɛ, meyɛ ade trenee na mede me ho to wo so koraa. ² Sɔ me hwɛ, Awurade, na hu m’adwene. ³ Wo dɔ a wodɔ me daa no yɛ m’akwankyerɛ; wo nokware no kyerɛ me kwan daa. ⁴ Me ne ahuhufo mmɔ. Me ne nyaatwomfo nni hwee yɛ. ⁵ Me ne nnebɔneyɛfo mmɔ, na mekwae mifi wɔn ho. ⁶ Awurade, mehohoro me nsa ma wuhu sɛ, menyɛ bɔne na meba mu betwa w’afɔremuka ho hyia, som wo. ⁷ Meto aseda nnwom na mepae mu ka w’anwonwade. ⁸ M’ani gye ofi a wote mu no ho, O Awurade, baabi a w’anuonyam te hɔ.

⁹ Nsɛe me mfra nnebɔneyɛfo no. Gye me fi awudifo nsam; ¹⁰ nnipa a daa wɔyɛ bɔne na daa wɔasiesie wɔn ho ama adanmudegye no.

¹¹ Me de, meyɛ ade trenee; hu me mmɔbɔ na gye me nkwa.

¹² Amane mu, me ho nka; mekamfo Awurade wɔ ne manfo mu.