Nnwom 29  Nkwa Asem

Awurade nne wɔ ahum mu

29 Mo ɔsorosorofo, monkamfo Awurade; monkamfo n’anuonyam ne ne tumi. ² Monkamfo ne din a anuonyam ahyɛ no ma no. Sɛ Kronkronni no pue a, monkotow no. ³ Wɔte Awurade nne wɔ ɛpo so. Anuonyam Nyankopɔn bɔ aprannaa ma ne nne tra ɛpo so. ⁴ Wɔte Awurade nne wɔ tumi ne ahoɔden mu. ⁵ Awurade nne bubu sida, Lebanon sida mpo. ⁶ Ɔma Lebanon ne Sirion mmepɔw nyinaa huruhuruw te sɛ nantwi ba. ⁷ Awurade nne ma aprannaa pae. ⁸ Ne nne ma sare so wosow. Ɔwosow Kadeɛ sare. ⁹ Awurade nne wosow adum ma ɛso nhaban porow gu bere a obiara a ɔwɔ ne Fi no teɛm se, “Anuonyam nka Onyankopɔn!” no.

¹⁰ Awurade di nsu a emu dɔ nyinaa so; odi hene daa daa. ¹¹ Awurade ma ne nkurɔfo ahoɔden, hyira wɔn, ma wɔn asomdwoe nso.