Nnwom 108

Nkwa Asem

Mpae a wɔbɔ tia atamfo

108 Mewɔ gyidi, O Onyankopɔn! Mɛto dwom makamfo wo! Me kra, keka wo ho!

² Me sanku ne me bɛnta, monkeka mo ho! Mɛma owia akeka ne ho. ³ O Awurade, mɛda wo ase aka aman ho! Meyi wo ayɛ aka nnipa ho. ⁴ Wo dɔ a wowɔ daa no adu ɔsoro atifi, na wo nokware kɔka wim. ⁵ Kyerɛ wo kɛseyɛ wɔ soro, O Onyankopɔn, ne w’anuonyam wɔ asase so nyinaa. ⁶ Fa wo tumi gye yɛn nkwa; bua me mpaebɔ sɛnea ɛbɛyɛ a wubegye nkurɔfo a wodɔ wɔn no.

⁷ Onyankopɔn aka wɔ ne kronkron mu kronkron hɔ se, “Ahurusi mu, mɛkyɛ Sekem mu na makyekyɛ Sukot Bon no mu ama me nkurɔfo. ⁸ Gilead yɛ me de; Manase nso saa ara; Efraim yɛ me dade kyɛw, ɛnna Yuda nso yɛ m’adehye akyeampoma. ⁹ Nanso mede Moab bɛyɛ me guasɛn na matow me mpaboa agu Edom so de akyerɛ sɛ ɔyɛ me de. Mɛteɛm ahurusi so magu Filistifo so.”

¹⁰ O Onyankopɔn, hena na ɔde me bɛkɔ kurow a wɔrewɛn no mu? Hena na ɔde me bɛkɔ Edom?

¹¹ Nokware sɛ woapo yɛn anaa? Woremfa yɛn nsraadɔm ntu sa anaa? ¹² Boa yɛn na yentumi nnyina yɛn atamfo anim; ɔdasani mmoa nni mu. ¹³ Sɛ Onyankopɔn wɔ yɛn afa yi, yebedi nkonim; obedi yɛn atamfo so.