Matay 7

Ne Bibliaj Tik Nawat

—Maka shiktenewakan aka ipanpa tay kichijtuk, ma inte aka yawi metzintenewa! ² Ika kenha ken ankichiwat juzgar, ijkiunisan yawit metzinchiwat juzgar, wan taiwan antatamachiwat yawit tatamachiwat anmupal. ³ Ken ka tikita ne sakatzin tik ne iish ne muiknew? Wan ne taketzal nemi tik ne muish inte tikita? ⁴ Wan ken tiaw tikilwia ne muiknew: "Shikajkawa ma nikishti ne sakatzin ijtik muish," wan shikita ne taketzal tikpia tik ne muish! ⁵ Tensasal! Shikishti achtu ne taketzal tik ne muish; wan kwakuni tiaw titachia yek pal weli tikishtia ne sakatzin nemi tik ne iish ne muiknew!

⁶ Maka shumet shikintakulikan ne pejpelumet tay ipal Teut, nian shikintamutilikan kujkusti ne kujkuyamet, su inte ankinekit ma kipachanakan iwan ne inhijikshi wan ma muishkwepakan pal metzintapanat.

⁷ Shitajtanikan wan metzinmakasket; shitatemukan wan ankiajsisket; shitatujtunwikan wan kitapusket ne tenkal. ⁸ Ika muchi ká tajtanit kikwit, wan muchi ká taishtemuat kiajsit, wan pal muchi ká tatujtunwiat yawi mutentapua. ⁹ Katiawel ne takat, su ne anmukunew kitajtani tamal, kimakaskiat se tet, ¹⁰ wan su ne anmukunew metzintajtanilia se michin, kimakaskiat se kuat? ¹¹ Yajika, su anmejemet ká inte yejyek kinmakat ne anmupilawan tay yek, keski mas Anmuteku ka ikajku yawi kinmaka tay yek muchi ne kitajtaniliat.

¹² Yajika, muchi tay ankielewiat ma metzinchiwilikan, shikinchiwakan ijkiuni anmejemetsan, ika yaja tay ina ne tajtuli wan ne taketzanimet.

¹³ Shikalakikan tik ne uchulnaj tentzakka; ika kuyawak ne tentzakka wan patawak ne ujti techwika hasta ne puliwis, wan miak ne kalakit! ¹⁴ Uchulnaj ne tentzakka wan uij ne ujti techwika kanka welit tiyujyultuk, wan sujsul chiujchiupi ne welit ajsit!

¹⁵ Shiktalikan cuidadoj inwan ne tashijshikuanimet walejkut anmutech tajtakentijtuk iwan ikwetashyu masat, melka kalijtik yejemet kuyumet ne muishtemuat pal metzinhitzkiat. ¹⁶ Ipanpa intajtakil ankinhishmatisket: itech ne witzkilit inte mululuat shujshukut nian itech ne witztumat tzajtzaput. ¹⁷ Ijkiuni, ne yek kwawit yejyek itakil tamaka; ne kwawit inte tatka ipatiw itajtakil inte tamaka yejyek. ¹⁸ Inte weli tamaka se yek kwawit itajtakil inte yejyek; nusan se kwawit inte yek inte weli tamaka yejyek itakil. ¹⁹ Ne kwawit ne inte tamaka itakil yek mutzinewa wan mutamuta tik tit. ²⁰ Neka nina ka ipanpa intajtakil anyawit ankinhishmatit.

²¹ Te muchi ká nechilwiat "tajtzin, tajtzin!" yawit kalakit tik ne tatekimakalis ipal ne ilwikak asunte semaya ne kichiwat tay kielewia ne Nuteku ka ikajku. ²² Miak yawit nechilwiat tik uni tunal: "Tajtzin tajtzin shikita! Titamachtijket tik mutukay, wan tik mutukay tiktajkalket najnawal inteyek, wan tik mutukay tikchijket miak wejwey!" ²³ wan niaw nikinhilwia: "Inte nimetzinhishmati! Shinechajkawakan, tekitinimet pal inteyek!"

²⁴ Yajika tel, ká kikaki ini pajpalabraj wan kichiwa ken nina, ninaskia ka yaja ken se kimati yek ne kiketzki ne ikal ijpak ne tesual, ²⁵ wan chachapakak ne shupan wan walaj ne tepeat wan kishpitzki ne ejekat wan kiwitek uni kal wan te walkuwetzki ika kipia itetzilnaj ijpak tesual. ²⁶ Wan ká kikaki ini pajpalabraj wan te kichiwa tatka, ninaskia ka yaja muchiwas ken ne mele ne kiketzki ne ikal ijpak ne ashal, ²⁷ wan chachapakak ne shupan wan walaj ne tepeat wan kishpitzki ne ejekat wan kitaski uni kal wan walkuwetzki wan wilewik muchi.