Matay 2
Ne Bibliaj Tik Nawat
Ne tamatinimet ipal taneskan
2 Kwak Yeshu nesik tik Bet-Lejem, Yudaya, tik ne tujtunal pal ne tatuktiani Herodes, né ajsiket ka Yerushalem tamatinimet pal taneskan 2 inat:
—Kan nemi ne tatuktiani pal ne Yudayujmet ne ashan nestuk? Ika tikitaket kisa ne isital wan tiwalajket timutankwaketzat.
3 Kwak ne tatuktiani Herodes takakik, mukakasuj, wan muchi Yerushalem kenhaya, 4 wan kinsentepew muchi ne weypalejmet wan tajkwiluanimet pal ne chinamit wan kintajtanilij kan nesiskia ne Mawaltijtuk, 5 wan kilwijket ka tik Bet-Lejem tik Yudaya, ika ijkini tajkwilujket ne taketzanimet:
6 "Wan taja Bet-Lejem, tal pal Yuda,
inte tichikitik itzalan tatuktianit pal Yuda,
ika mutech walkisas se tatuktiani
yawi kitajpia nutechan Israel."
7 Kwakuni Herodes kinnutzki ichtaka ne tamatinimet wan kintajtanilij keman muitak ne sital, 8 wan kintuktij ka Bet-Lejem wan inak:
—Shumet shiktajtanikan ken ijtuk iwan ne kunetzin, wan kwak ankiajsitiwit shinechilwikan pal naja nusan weli niaw nimutankwaketza.
9 Kikakket ne tatuktiani wan yajket, wan né ne sital ne kitztuyat ka taneskan yajki yajki inhishpan hasta nakak ijpak kan nemituya ne kunetzin, 10 wan kwak kitaket ne sital pakiket sujsul. 11 Wan kalakket tik ne kal wan kitaket ne kunetzin iwan Maryam inan, wan mutamutaket talchi wan mutankwaketzket wan kitakulijket teukwit wan kupal wan pajti.
12 Wan tik se temikilis kinnawatilijket ma inte mukwepakan itech Herodes. Yajika panuket tik ukse ujti wan yajket ka intechan.
Herodes kinmiktij muchi ne shujshulut
13 Kwak yajtiwita, Yosep kitemikik wan né kitak se tanawatiani ipal Tutajwan ina:
—Shikisa wan shikwika ne kunetzin wan ne inan muwan wan shichulu ka Egipto wan shinaka ka ikuni hasta ma nimetzilwi, ika Herodes kineki kishtemua ne kunetzin pal kiwilewa.
14 Kiski ka tayua wan kinwikak ne kunetzin wan ne inan iwan wan yajki ka Egipto, 15 wan ikuni nakaket hasta mikik Herodes, pal kiane welik yektia tay inatuk Tutajwan itech ne itaketzani kwak ina:
"Niknutzki nutelpuch ma kisa tik Egipto."
16 Kwakuni Herodes kwak kitak ka ne tamatinimet kipakilijket, sujsul kwalanik wan tatuktij ma kinmiktikan muchi ne pipiltzitzin tik Bet-Lejem wan tik muchi ne tal ka nepa kipiatuyat hasta ume shiwit tik ne tunal kwak yaja kintajtanilijtuya ne tamatinimet. 17 Kwakuni yekawik tay inatuk ne taketzani Yeremiya, ina:
18 "Tik Rama mukakik se chuka, ijiumiki:
uni Rajel chuka inpanpa ipilawan
wan te mukawa ika yejemet intea kanaj."
19 Kwak mikik Herodes, Yosep kitemikik tik Egipto wan né kitak se tanawatiani ipal Tutajwan 20 ina:
—Shikisa wan shikwika ne kunetzin wan ne inan muwan wan shimukwepa ne tal pal Israel, ika miktiwit ne kishtemuat katka ne kunetzin pal kimiktiat.
21 Wan yaja kiski wan kiwikak ne kunetzin wan ne inan iwan wan yajki ne tal ipal Israel. 22 Kwak takakik ka Arkelaos nemi tatuktia tik Yudaya tik ne ipuestoj Herodes iteku, inte kinekik yawi ka né ika majmawi, wan kilwijket tik se temikilis ma yawi wejka wan ajsik ne taltakutun ipal Galilaya. 23 Wan yajki wan nemik tik se techan itukay Nazaret, pal kiane yekawi tay inatuk itech ne taketzanimet, ka yaja "munutzas Nazarayuj".
Ne Bibliaj Tik Nawat · © 2008, 2012 Jan Morrow