Matay 16 Ne Bibliaj Tik Nawat
Ne Parishayujmet kitajtanit se pal muishmati
16 Wan ne Parishayujmet wan ne Tzadukayujmet ajsiket kiejekuat. Kitajtanket ma kilwiti se pal muishmati pal ne ilwikak. 2 Yaja kinhilwij:
—[Kwak tayuaki anhinat: "Musta tachia ika chichiltia ka ikajku." 3 Wan kwak tatwi: "Ashan shupan witz ika chichiltia ka ikajku wan nemi tristej." Yek anwelit ne itachishka ne ilwikak; ken ka inte welit ankishmatit ne tujtunal tinemit?] 4 Ne takamet pal ashan inte yejyek! Mawiltianimet! Kitemuat se pal muishmati wan te kipiasket, sema ne ipal Yona.
Wan kinhajkaw wan yajki.
Cuidadoj iwan ne shukutishti!
5 Wan kwak ne mumachtianimet yajket sentapal ne at, kielkawket kiwikat pan pal takwat. 6 Yeshu kinhilwij:
—Shitachiakan wan shiktalikan cuidadoj iwan ne shukutishti pal ne Parishayujmet wan ne Tzadukayujmet!
7 Yejemet inat ka yaja inak "ika inte talkwijket ne pan". 8 Ne Yeshu kimatki wan inak:
—Tay anyultaketzat, anmejemet ká inte kipiat tayulmatilis? Anhinat ka ninak ika inte kanaj ne pan? 9 Inteuk ankimatit ne makwil tamal ipal ne cinco mil takat wan keski chikiwit ankianket, 10 nian ne chikume tamal pal ne cuatro mil takat wan keski ankianket? 11 Ken ka inte ankimatit ka inte nina ipanpa ne pan kwak naja nimetzinhilwij "Cuidadoj iwan ne shukutishti pal ne Parishayujmet wan ne Tzadukayujmet"?
12 Kwakuni yejemet kimatket ka inte kinekituya ina ma kitalikan cuidadoj iwan ne tishti pal ne pan asunte iwan ne tamachtilis pal ne Parishayujmet wan ne Tzadukayujmet.
Ká ne Itelpuch ne Takat?
13 Yeshu ajsik ne tajtal pal Kaysarea Pilipo wan kintajtan ne mumachtianimet:
—Ká inat ka ne Itelpuch ne Takat?
14 Yejemet inaket:
—Sejse inat ka yaja Yojan ne teulyujmaka, sejse ka Eliya, sejseuk ka Yeremiya wan su te, se pal ne taketzanimet.
15 Kinhilwia:
—Anmejemet ken inat? Ká naja?
16 Shimon Pedro inak:
—Taja ne Mawaltijtuk, ne itelpuch ne Teut yultuk.
17 Yeshu kilwij:
—Tikpia suertej, Shimon Bar-Yona, ika inte metzmachtij se ken tuweyka asunte Nuteku ka ikajku. 18 Wan naja nimetzilwia ka taja ti Pedro wan ijpak ini tesual niaw niketza nukalsennemit. Wan ne tejtentzakka pal ne miktanshaput inte welisket kichiwiliat tatka. 19 Niaw nimetzmaka ne iwan mutentzakwa wan mutentapua ne tatekimakalis ipal ne ilwikak. Wan muchi ká tikilpia pak ne tal, ilpituk nemis tik ne ilwikak; wan ká tiksutuma pak ne tal, sutuntuk nemis tik ne ilwikak.
20 Kwakuni kintuktij ne mumachtianimet ma inte kilwikan aka ka yaja ne Mawaltijtuk.
Asu aka kineki yawi nuipan...
21 Tipan Yeshu pejki kinmachtia ne mumachtianimet ka yaja nemi pal yawi tik Yerushalem pal taekua wey, ika ne noymet wan weypalejmet wan tajkwiluanimet yawit kijilwiat wan yawit kimiktiat wan yawi muyulkwi kwak panut yey tunal. 22 Wan Pedro kinutzki wan pejki kiajwa, ina:
—Tesu, Tajtzin, tesu; te yawi panu uni!
23 Yaja muishkwepki wan kiajwak Pedro, ina:
—Shiawa ka nuteputz, Tenewani, taja tinutatzunchaluas ika inte tikejketza tay ipal ne Teut asunte tay ipal ne takamet.
24 Kwakuni Yeshu kinhilwij muchi ne mumachtianimet:
—Asu aka kineki yawi nuipan, ma kielkawa muchi tay ipal wan ma kiana ne icruz wan ma yawi nuipan. 25 Ika ká tajpiaskia ne ialmaj yawi kipulua, wan ká kipuluskia ne ialmaj ka numaku yawi tajpia. 26 Ika ken kipalewia se asu muchi ne taltikpak ipal wan puliwi ne ialmaj? Wan tay weli tamaka se ipatka ialmaj? 27 Ika ne Itelpuch ne Takat yawi witz tik itawilyu ne Iteku itzalan ne tanawatianimet, wan kwakuni kintashtawasket muchi tay yejemet kichijtiwit. 28 Kia nimetzinhilwia ka ankakeski pal ne nikan nemit inte yawit mikit achtu ma kitakan ne Itelpuch ne Takat witz iwan itatekimakalis.
Ne Bibliaj Tik Nawat · © 2008, 2012 Jan Morrow