Lukas 16

Ne Bibliaj Tik Nawat

—Nemik se takat kipiatuya wey tumin wan kipiatuya se kalpiani. Wan kitenejket yajuni iishpan, inaket ka ne kalpiani kitzunpulua katka ne ipalwan. ² Wan kinutzki wan kilwij:

    "Tay ini nikaki ka tikchijtuk? Shinechkwepili ne tasenpualis ipal ne mukalpialis ika intea tiweli titajpia ne nukal."

³ Ne kalpiani inak tik iyulu:

    "Tay niaw nikchiwa? Ika ne nutekuyu nechishtilia ne nutekiw: inte niweli nitawawana; pal nitajtani, nishpinawa... ⁴ Nikmati tay niaw nikchiwa, pal kwak nikajkawa ne kalpialis ma nechkwikan tik inkajkal!"

⁵ Wan sejse ika kalinnutzki ne takwinimet, wan kitajtanilij ne achtu:

    "Keski tikwikilia ne nutekuyu?"

⁶ Inak yaja:

    "Sentzunti wajkal tumakka."

Inak ne takat:

    "Shikpia ne muamaw; ashkan shimutali wan shitajkwilu unpual-majtakti."

⁷ Tipan kilwij seuk:

    "Taja keski tikwikilia?"

Inak yajuni:

    "Sentzunti almun sinti."

Kilwia:

    "Shikpia ne muamaw wan shitajkwilu: nawpual."

⁸ Wan ne itekuyu inak ka yek tay ne kalpiani teyek kichijki ika kipishki tamatilis, ika ne takamet ipal ini taltikpak tamatit mas ipanpa tay ipal ashan que ne ikukunew ne tawil. ⁹ Wan nimetzinhilwia ma shimuchiwakan iajamigojwan ne tuminpiani teyek pal kiane kwak inte ankanaj ma metzinkwikan tik ne tajtawipanti pal senpa.

¹⁰ Ká ne kichiwa tay yek tik ne tay chikitik nusan tik ne tay wey kichiwa tay yek, wan ká ne kichiwa tay inte yek tik ne tay chikitik nusan tik ne tay wey kichiwa tay inte yek. ¹¹ Yajika, asu inte ankichijket tay yek iwan ne tuminpiani ne inte yek, ká yawi metzinhajkawa antajpiat ne tay tejkia? ¹² Wan asu inte ankichijket tay yek iwan tay tepal, ká yawi metzinmaka tay anmupal?

¹³ Se kaltekitini inte weli tekiti ipal ume itekuyu, ika kishijias ne se wan kitasujtas ne seuk, wan asu inte, kitajpias ne se wan kijilwis ne seuk. Inte welit antekitit ipal ne Teut wan ipal ne tumin.

—Anmejemet anmusel kinhilwiat ne takamet ka anmejemet yejyek. Ne Teut kishmati ne anmuyujyulu, ika nusan tay ne pal takamet tetekia wey, ijyak tik itachialis ne Teut.

¹⁶ Ne tajtuli wan ne taketzanimet ajsit hasta Yojan, kwakuni pewa muyeknawatia ne itatekimakalis ne Teut wan muchi kinekit kalakit kalijtik. ¹⁷ Mas uij ma wetzi nian se letraj ipal ne tajtuli que ma tamikan ne ilwikak wan ne tal.

¹⁸ Su aka kiajkawa isiwaw wan munamiktia iwan seki, mawiltia. Wan ká munamiktia iwan se siwat muajkawtuk iwan ishulejyu, mawiltia.

—Nemik se takat kipiatuya wey tumin ká kipiatuya ikwajkwach yektzin wan tatwa katka mujmusta. ²⁰ Wan se inte kipia tatka, itukay Lazar, mutamutatuk pelechnaj itech itenkal, ²¹ ne kielewiskia mutakwaltia su weli iwan tay ne wetzi talchi kan takwa katka ne kipiatuya wey, wan hasta ne pejpelumet ajsit kishpaluat ne ichijchiraj.

²² Muchijki ka mikik ne inte kipiatuya tatka wan ajsiket ne tanawatianimet wan kiwikaket itech ielpan Abraham. Nusan ne kipiatuya wey tumin mikik, wan mutalpachuj, ²³ wan tik ne miktanshaput, kwak tajselia nemi, ajkutachishki wan né wejka kita Abraham iwan Lazar itech ielpan, ²⁴ wan yaja tzajtzalij, inak:

    "Abraham nuteku, shinechpalewi wan shiktukti Lazar ma wiki wan ma kituka ne itzunmapipil ijtik ne sesek at wan ma kiajwili ne nunenepil ika nechkukua ini tit!"

²⁵ Abraham inak:

    "Pipil, shikelnamiki ka taja tikpishki muchi tay yek kwak tiyultuk wan Lazar kipishki tay inte yek. Ashan ka nikan, yaja ma tajtani, taja ma shitajseli. ²⁶ Nusan, itzalan tejemet wan anmejemet muchijki se wey ustut, ken ne nikan nemit ne kinekiskiat panut hasta kan annemit inte welit, nian welit panut ka nikan ne nemit ka ikuni."

²⁷ Kwakuni inak:

    "Asu ijkiuni, nimetztajtani, nuteku, ma shiktukti ma yawi ichan nuteku, ²⁸ ika naja nikpia makwil nuikaw, pal kinnawatia ma te wikikan yejemet ka nikan tajseliat nusan."

²⁹ Ina Abraham:

    "Kipiata Moshe wan ne taketzanimet. Ma kinkakikan."

³⁰ Yaja inak:

    "Inte, nuteku Abraham; melka uni, asu yasneki ajaka pal ne miktiwit intech, san muyulpatasket."

³¹ Kwakuni kilwij:

    "Asu inte kinkakit Moshe wan ne taketzanimet, melka muketzaskia ajaka pal ne miktiwit nusan inte tayulmatisket."