Korintofo I 16

Nkwa Asem

Towyi

16 Asɛm a ɛfa tow a wobeyi de aboa Onyankopɔn asafo mma a wɔwɔ Yudea ho no ni: Ɛsɛ sɛ moyɛ nea meka mekyerɛɛ Galati asafo horow sɛ wɔnyɛ no bi. ² Kwasida biara, sika a moanya no, momfa bi nsie baabi sɛnea meba mo nkyɛn a, ɛremma munyi tow. ³ Sɛ meba kɔ a, mɛkyerɛw adansedi krataa mede asoma nnipa a mopene so sɛ mensoma wɔn na wɔabegye mo akyɛde no de akɔ Yerusalem. ⁴ Sɛ ɛho hia sɛ me ne wɔn ba a, me ne wɔn bɛba.

Paulo nhyehyɛe

⁵ Sɛ mifi Makedonia a na mɛba mo nkyɛn, efisɛ, mɛfa hɔ. ⁶ Ebia medi nna kakra wɔ mo nkyɛn. Ebia medi awɔw bere no wɔ mo nkyɛn. Ɛno akyi moaboa me ama makɔ baabiara a mepɛ sɛ mekɔ. ⁷ Mempɛ sɛ medi nna tiaa bi mo nkyɛn. Na mmom mewɔ anidaso sɛ, sɛ Awurade pɛ a, mɛtena mo nkyɛn akyɛ. ⁸ Nanso mɛtena Efeso ha yi akosi Pentekoste da no. ⁹ Ɛwom sɛ wɔn a wɔasɔre tia me dɔɔso de, nanso akwan pa a metumi mafa so madi dwuma pa wɔ ha.

¹⁰ Sɛ Timoteo ba mo kyɛn wɔ ha a, monsom no hɔho, efisɛ, ɔreyɛ Awurade adwuma sɛnea meyɛ yi ara. ¹¹ Obiara mmu no abomfiaa na mmom, mommoa no na ontu ne kwan yi asomdwoe mu na watumi asan abɛka me nsa, efisɛ, merehwɛ ɔne anuanom no anim.

¹² Ɛfa onua Apolo ho nso, metaa hyɛ no nkuran sɛ ɔne anuanom a aka no ntaa nsra mo, nanso ɔnyɛɛ n’adwene sɛ ɔbɛkɔ mprempren ara. Sɛ onya kwan de a, ɔbɛkɔ.

¹³ Monnwɛn, momma mo gyidi mu nyɛ den; mo bo nyɛ duru na munnya ahoɔden.

¹⁴ Momfa ɔdɔ nyɛ mo nnwuma nyinaa. ¹⁵ Munim Stefana ne ne fifo ho asɛm. Wɔyɛ nnipa a wɔdan bɛyɛɛ Kristofo kan wɔ Hela na wɔde wɔn ho ama Onyankopɔn adwumayɛfo. Mesrɛ mo, me nuanom, ¹⁶ sɛ munni nnipa a wɔte saa ne wɔn a wodi saa dwuma no bi na wɔne wɔn som no akyi. ¹⁷ M’ani gye Stefana, Fortunato ne Akaiko ba a wɔbae no ho. Wobesii mo ananmu ¹⁸ na wɔama m’ani agye sɛnea wɔmaa mo ani gyei no ara pɛ. Ɛsɛ sɛ yɛkae nnipa a wɔte saa no.

¹⁹ Asafo a wɔwɔ Asia no kyia mo. Akwila ne Priskila ne asafo a wohyia wɔn fi no nso kyia mo. ²⁰ Anuanom a wɔwɔ ha no kyia mo. Momfa ɔdɔ nkyiakyia mo ho mo ho.

²¹ Me ara me nsa ano nkyerɛwee ni: Me Paulo, mikyia mo. ²² Obiara a ɔnnɔ Awurade no, nnome mmra ne so. Maranata “Yɛn Awurade, bra!” ²³ Awurade Yesu adom mmra mo so. ²⁴ Me dɔ nka mo nyinaa wɔ Kristo Yesu mu.