A A A A A
Bible Book List

Job 29Ang Pulong Sang Dios (HLGN)

Ang mga Pagpakamaayo nga Nabaton ni Job Sadto

29 Nagpadayon pa gid si Job sa paghambal, “Kon mabalik lang kuntani ang mga nagligad nga mga inadlaw sang ginabantayan pa ako sang Dios, sang ginasanagan pa niya ang akon dalanon samtang nagalakat ako sa madulom. Sadtong tion nga maayo pa ang akon kahimtangan, ang Dios amo ang akon suod nga abyan, kag ginapakamaayo niya ang akon panimalay. Ginaupdan pa ako sadto sang Makagagahom nga Dios, kag kaupod ko pa ang akon mga anak. Sadto nga tion, ang akon mga baka nagahatag sang madamo gid nga gatas, kag ang akon mga talamnan sang olibo nagahatag sang madamo gid nga lana. Kon magkadto gani ako sa puwertahan sang banwa, kag mag-upod sa mga manugdumala sang siyudad kon magmiting sila, nagapahigad ang pamatan-on nga mga lalaki kon makita nila ako, kag ang mga tigulang nagatindog sa pagtahod sa akon. Nagahipos bisan ang mga pangulo 10 kag ang dungganon nga mga tawo pagkakita nila sa akon. 11 Ang bisan sin-o nga nakakita sa akon ukon nakabati sa akon maghambal, nagadayaw sa akon. 12 Kay ginabuligan ko ang mga imol nga nagapangayo sang bulig kag ang mga ilo nga wala sing dalangpan. 13 Ginapakamaayo ako sang tagumatayon nga mga tawo nga akon ginbuligan, kag nalipay gid ang mga balo nga babayi nga akon man ginbuligan. 14 Ginahimo ko permi ang matarong kag husto; daw bayo kag turban ini nga akon ginasuksok. 15 Nangin pareho ako sang mata sa tawo nga bulag kag tiil sa tawo nga piang. 16 Nangin pareho ako sang isa ka amay sa mga imol, kag bisan ang mga estranghero ginbuligan ko sa ila mga kaso. 17 Gindula ko ang gahom sang malaot nga mga tawo kag ginluwas ang ila mga biktima.

18 “Naghunahuna ako nga magakabuhi ako sing malawig kag mapatay nga ginalibutan sang akon pamilya. 19 Kay pareho ako sadto sang mabakod nga kahoy nga nagapangalapkap ang mga gamot sa tubig kag permi ginatun-ogan ang mga sanga. 20 Ginadayaw ako permi sang mga tawo kag permi ako mabaskog. 21 Kon maghatag ako sang laygay, nagahipos ang mga tawo kag nagapamati sing maayo. 22 Pagkatapos ko hambal, wala na sila sang may idugang pa kay kontento sila sa akon ginhambal. 23 Ginahandom nila ang akon mga pulong pareho sang ila paghandom sa ulan. Gusto gid nila ini nga pamatian. 24 Daw indi sila makapati kon magyuhom ako sa ila;[a] ang akon malipayon nga nawong nakapabaskog sa ila. 25 Ginatudluan ko sila sang ila himuon pareho sa isa ka pangulo. Ginadumalahan ko sila pareho sa isa ka hari nga nagadumala sa iya mga soldado. Ginalipay ko sila kon nagakasubo sila.

Footnotes:

  1. Job 29:24 24 Daw indi ... sa ila: ukon, Kon nadulaan sila sang paglaom, ginayuhuman ko sila.
Ang Pulong Sang Dios (HLGN)

Hiligaynon Bible (Ang Pulong Sang Dios) Copyright © 1996, 2006 by Biblica, Inc.® Used by permission. All rights reserved worldwide.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes