A A A A A
Bible Book List

Jesus Guys 4Hawai‘i Pidgin (HWP)

Peter An John Go In Front Da Main Leadas

Peter an John was still yet talking wit da peopo, wen da priest guys, da captain fo da security guards fo da temple, an da Sadducee guys wen come by dem. Dey stay real huhu cuz da guys wen teach da peopo, an wen tell dem dat cuz Jesus wen come back alive from mahke, dat show, dat da mahke guys goin come back alive again. So dey wen bus Peter an John. Da sun jus wen go down, so dey wen put dem in jail till da nex day. But plenny peopo dat wen hear dem wen trus wat dey wen say. Had bout five tousand guys dat wen trus Jesus.

Da nex day da main leadas, da older leadas, an da teacha guys dat teach Godʼs Rules wen come togedda inside Jerusalem. Annas, da Head Priest guy, wen come, an Kaiafas, John, Alexander, an da odda guys from da Head Priest ohana. Dey wen tell some guys fo bring Peter an John in front dem, an dey wen aks dem, “Eh, wat kine power you guys get fo do all dis stuff? Wat name you wen use?”

Den Godʼs Spesho Spirit wen take charge a Peter. He wen tell dem, “You leada guys, an da older leada guys fo da peopo, you guys wen bring us hea dis day. Was cuz we wen help one guy dat no can walk, o wat? You guys like know how he wen come good? 10 Kay den. You guys an all da odda peopo from Israel, good you know dis: Jesus from Nazaret, da Spesho Guy God Wen Send, we his guys. You guys wen kill him on top one cross, but God wen make him come back alive again. Dass why dis guy wen come good, cuz he stay tight wit Jesus. An now dis guy can stand hea in front you guys. 11 Jesus, he da One da Bible talk bout:

‘Da stone da builda guys neva like use, cuz dey tink was junk,
Dat wen come da corner block fo da house.’

12 No mo odda guy dat can take da peopo outa da bad kine stuff dey doing. Neva have nobody in da whole world dat we gotta stick wit fo take us outa da bad kine stuff we doing. God ony wen give us Jesus fo do dat.”

13 Da leadas wen see dat Peter an John wen talk wit power an dey not scared. An da leadas wen know dat Peter an John jus regula guys dat neva go school fo learn, an dat wen blow dea minds. An dey know dat dis guys, dey wen stay wit Jesus. 14 But da leadas can see da guy dat Peter dem wen make come good, stay standing dea wit dem, so dey no can say notting. 15 So da leada guys tell Peter an John fo go outside, an da leada guys wen talk togedda. 16 Dey say, “Wat we goin do wit dem? Everybody dat stay inside Jerusalem know dat dey wen do one awesome ting dat show wat kine dem. An us guys no can say dass not true. 17 We gotta tell dese guys, ‘You guys betta not talk bout dis guy Jesus to nobody no moa! No use his name fo do stuff!’ No good all da odda peopo all ova da place hear bout dis ting!”

18 Den da leada guys wen tell Peter an John fo come inside one mo time. An dey tell dem, “No talk o teach nobody bout da guy Jesus no moa, an no use his name fo do stuff!” 19 But Peter an John wen say, “You guys figga fo yoaself wat God tink: Mo betta fo do wat you guys say, o fo do wat God say? 20 Cuz us guys, we no can stop talking bout da stuff we wen see an hear.” 21 So dey tell um one mo time dey betta not talk bout Jesus no moa, an den dey wen let um go. Dey no can figga how fo punish dem, cuz all da peopo wen stay telling dat God awesome, cuz a everyting dat happen. 22 Cuz da guy dey wen make come good in dis awesome way, he stay mo den forty years old awready.

Da Guys Dat Trus God Pray Fo Talk An No Come Scared Wen Dey Talk

23 Afta da leada guys let Peter an John go, dey go home by dea own peopo, an tell dem everyting da main priest guys an da older leada guys wen say to dem. 24 Wen dea own peopo wen hear dat, dey wen pray togedda lidis: “Boss, you da King. You wen make da sky, da earth, an da sea, an everyting dat stay inside dem. 25 Yoa Spesho Spirit wen talk fo you wen yoa worka guy, our ancesta David, wen say,

‘How come da diffren peopos dat no trus God come huhu an wild?
    How come da peopos tinking fo do stuff dat no good fo notting?
26 Da kings from all ova da earth stand up,
    An dea leadas come togedda fo fight agains da Boss
An da Spesho Guy He Wen Send.’

27 “An dass wat wen happen! Had King Herod an da governa Pontius Pilate, an da peopo dat not Jews, an da Israel peopo. Dey all wen come togedda inside dis town fo plan how dey can kill Jesus. He yoa Good An Spesho Worka Guy, da One You Wen Send. 28 Dey do wat you wen know long time befo gotta happen. An you wen let dem do um. 29 Now, Boss, listen wat dey say agains us, an give us da kine power wen we talk fo no come scared. 30 We like you make da sick guys come good an show awesome tings wit yoa power wen us guys use yoa name, cuz a wat yoa Good An Spesho Worka Guy Jesus wen do.”

31 Wen dey pau pray, da place wea dey stay togedda wen shake. An Godʼs Spesho Spirit wen take charge a all dem. An dey wen tell da tings God say wit power, an dey neva come scared.

Da Peopo Dat Trus God Give Dea Stuffs To Each Odda

32 All da peopo dat wen trus God wen come jalike one inside dea hearts an come jalike one how dey tink. Nobody say dat his stuffs stay his own, but dey stay share everyting dey get wit each odda. 33 Da guys Jesus wen send all ova, dey stay telling dat Jesus wen come back alive. Dey talk wit plenny power, an da way dem guys stay, can see dat God stay do choke plenny good stuff fo all dem. 34 Neva have nobody wit dem dat wen need anyting. Eh, even da peopo dat wen own land o houses wen sell um, 35 an give da money to da guys Jesus wen send all ova. An den dey give da money to da peopo dat need um, litto bit o plenny.

36 Had one guy name Joseph, from da Levi ohana. He from Cyprus Island. Da guys Jesus wen send wen give um da nickname Barnabas, cuz dat mean “Da guy dat give us good kine words.” 37 He wen sell one field he wen own, an den give da money to da guys Jesus wen send.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes