A A A A A
Bible Book List

Jesus Guys 11Hawai‘i Pidgin (HWP)

Peter Talk To Da Church Guys Inside Jerusalem

11 Da guys Jesus wen send an da bruddas an sistas all ova Judea side wen hear, dat some a da peopo dat not Jews wen trus wat God wen say too. Wen Peter go Jerusalem, da Jewish bruddas dat trus da Good Kine Stuff Bout Christ wen squawk at him. Dey say, “You go by some peopo dat not Jews, an wen go inside dea house, an eat wit dem.” Den Peter wen tell um all da stuff dat wen happen from da start.

He say, “I wen stay Joppa town, an I wen pray. I see someting jalike one dream. Had one big sheet dat come down from da sky by da four corners, an wen come down wea I stay. I wen look inside um real good, an see all kine animals from da earth dat get four feet, wild animals, snakes, lizards, an birds. Den I hear one voice dat say, ‘Eh Peter! Stand up! Kill um an eat um!’ But I say, ‘No way, Boss. I neva eat notting dat stay kapu, o dat I not suppose to eat.’ Da voice from da sky wen talk again, an say, ‘No say someting stay kapu dat God wen make okay.’ 10 Dat wen happen three times, an den da sheet wen go up to da sky again.

11 Right den an dea three guys wen come by da house wea I stay. One nodda guy wen send um by me from Cesarea. 12 Godʼs Spirit wen tell me, ‘No scared fo go wit dem now.’ Dese six bruddas hea, dey wen go wit me Cesarea side. An we wen go inside da guy Cornelius house. 13 Den he wen tell us dat one angel messenja guy wen come by his house an say, ‘Send some guys Joppa town fo bring back one guy name Simon dat dey call Peter. 14 He goin tell you da Good Stuff from me, so dat you an all yoa ohana can come outa da bad kine stuff you stay doing.’ 15 Wen I start fo talk, Godʼs Spesho Spirit wen take charge a dem, jalike he wen take charge a us at da start. 16 Den I rememba wat da Boss Jesus wen say, ‘John wen baptize da peopo wit water, but God goin baptize you guys diffren kine: he goin let his Spesho Spirit take charge a you.’ 17 So, if God give dem da same power he wen give us wen we trus da Boss Jesus, da Spesho Guy God Wen Send, how can I make big noise agains God?”

18 Wen dey hear dat, dey pau squawk, an dey tell how awesome God stay. Dey say, “Wow! God even let da peopo dat not Jews come sorry fo all da bad kine stuff dey wen do, so dey can get new kine life too!”

Da Peopo Dat Come Togedda Fo Church Inside Antiok

19 Now, da bruddas an sistas dat wen go all ova da place afta Stephen wen mahke, dey wen go all da way Fonicia, Cyprus, an Antiok, cuz Saul dem wen make da peopo dat trus Jesus suffa. An dey wen tell da Good Stuff From God, but dey ony wen tell da Jewish peopo. 20 But some a dem guys dat come from Cyprus an Cyrene, wen go Antiok, an wen start fo talk to da peopo dea dat talk Greek. Dey wen tell um da Good Stuff Bout Jesus da Boss. 21 Da Boss wen help dem, an plenny peopo wen start fo trus him.

22 Da peopo dat wen come togedda fo church inside Jerusalem wen hear bout dat, an dey wen send Barnabas Antiok side. 23 Wen he come, he see dat God wen do plenny good tings fo dem. He wen stay good inside, an wen give dem good kine words fo stick wit da Boss Jesus, an trus him wit all dea heart. 24 Barnabas, he one good guy. Godʼs Spesho Spirit stay in charge a him, an he stay trus da Boss plenny. An he wen bring plenny mo peopo fo trus da Boss Jesus.

25 Den Barnabas wen go Tarsus fo look fo da guy Saul. 26 He wen find him, an wen bring him Antiok. Barnabas an Saul wen stay togedda wit da odda bruddas an sistas dat come togedda fo church ova dea, an dey wen teach plenny peopo fo one year. Antiok was da first place wea odda peopo wen start fo call Jesus peopo “Christian.” Dat mean, “Christ kine peopo.”

27 Dat time some guys dat talk fo God wen come from Jerusalem to Antiok. 28 One a dem guys name Agabus wen stand up an Godʼs Spirit wen tell um fo say, “Goin get hard time all ova, wea eva da Rome peopo stay in charge. No goin get food notting.” (An dat wen happen wen Cesar Claudius wen stay da big king.) 29 Da peopo dat wen stick wit Jesus wen tink fo help da bruddas an sistas dat wen stay Judea side. An every guy wen give um wat he can. 30 Dey wen do dat, an dey wen send da gifs to da older leadas inside da church ova dea, an Barnabas an Saul wen take da money ova dea fo dem.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes