A A A A A
Bible Book List

Genesis 40Ang Pulong Sang Dios (HLGN)

Ginsaysay ni Jose ang Kahulugan sang Duha ka Damgo

40 1-2 Natabo sang ulihi nga ang pangulo sang mga manugsirbe sang bino sang hari sang Egipto kag ang pangulo sang iya mga manugluto sang tinapay nakasala sa iya. Naakig gid ang hari[a] sa sining duha niya ka opisyal. Gani ginpapriso niya sila sa balay sang kapitan sang mga guwardya sa palasyo, nga sa diin didto man si Jose ginpriso. Si Jose ang ginsaligan sang kapitan sang mga guwardya nga mag-atipan sa ila. Nagdugay sila didto sa prisohan.

Isa sadto ka gab-i, nagdamgo ang manugsirbe sang bino kag ang manugluto sang tinapay samtang didto sila sa prisohan. Ang kada isa sa ila lain ang damgo kag lain man ang kahulugan sang ila damgo. Pagkaaga, pagkadto ni Jose sa ila, nakita niya nga maluya sila. Gani ginpamangkot niya sila, “Ngaa nga masinulub-on kamo?” Nagsabat sila, “Nagdamgo abi kami pero wala sing may magsaysay sang kahulugan.” Nagsiling si Jose, “Ang Dios ang nagahatag sang kaalam sa pagsaysay sang kahulugan sang mga damgo. Abi sugiri ninyo ako kon ano ang inyo mga damgo.”

Gani ginsugid sang pangulo sang mga manugsirbe sang bino ang iya damgo. Siling niya, “Nagdamgo ako nga may isa ka puno sang ubas sa akon atubangan 10 kag may tatlo ini ka sanga. Nagpanalingsing ini, nagpamulak, kag naluto ang iya mga bunga. 11 Nagauyat kuno ako sang kupa sang hari sang Egipto kag nagpuksi sang ubas kag ginpuga ko dayon sa kupa. Pagkatapos ginhatag ko ang kupa sa hari.”

12 Nagsiling si Jose, “Amo ini ang kahulugan sang imo nga damgo: Ang tatlo ka sanga nagakahulugan sang tatlo ka adlaw. 13 Sa wala pa matapos ang tatlo ka adlaw, paguwaon ka sang hari sa prisohan kag pabalikon sa imo obra bilang manugsirbe sang iya bino. 14 Kabay pa nga dumdumon mo ako kon ara ka na sa maayo nga kahimtangan. Kag bilang pagpakita sang imo kaayo sa akon, sambita man ako sa hari agod mabuligan mo ako nga makaguwa sa prisohan. 15 Kay sa pagkamatuod, ginpuwersa lang ako nga dal-on diri sa Egipto halin sa lugar sang mga Hebreo, kag bisan diri wala man ako sing may nahimo nga sala agod prisohon.”

16 Pagkabati sang pangulo sang mga manugluto sang tinapay nga maayo ang kahulugan sang damgo, ginsugid man niya ang iya damgo kay Jose. Siling niya, “Nagdamgo man ako nga may ginalukdo ako nga tatlo ka alat nga may mga tinapay. 17 Ang sa ibabaw gid nga alat may sulod nga nagkalain-lain nga klase sang tinapay para sa hari sang Egipto, pero gintuka ini sang mga pispis.”

18 Nagsiling si Jose, “Amo ini ang kahulugan sang imo nga damgo: Ang tatlo ka alat nagakahulugan sang tatlo ka adlaw. 19 Sa wala pa matapos ang tatlo ka adlaw, paguwaon ka sang hari sa prisohan pero ipapatay ka niya kag ipabitay ang imo bangkay sa kahoy, kag pagatuk-on ka sang mga pispis.”

20 Karon, ang ikatlo nga adlaw kaadlawan sang hari sang Egipto. Gani nagpapunsyon siya para sa tanan niya nga mga opisyal. Ginpaguwa niya sa prisohan ang pangulo sang iya mga manugsirbe sang bino kag ang pangulo sang iya mga manugluto sang tinapay kag ginpaatubang sa iya mga opisyal. 21 Ginpabalik niya ang pangulo sang mga manugsirbe sang bino sa iya obra 22 pero ginpapatay niya ang pangulo sang mga manugluto sang tinapay, kag ginpabitay ang iya bangkay sa kahoy. Natabo tanan ang ginsiling ni Jose sa ila. 23 Pero wala gid makadumdom ang pangulo sang mga manugsirbe sang bino kay Jose.

Footnotes:

  1. Genesis 40:1 1,2 hari: sa literal, Faraon. Amo man sa masunod nga mga bersikulo.
Ang Pulong Sang Dios (HLGN)

Hiligaynon Bible (Ang Pulong Sang Dios) Copyright © 1996, 2006 by Biblica, Inc.® Used by permission. All rights reserved worldwide.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes